علشان تبقي عروسة زي القمر
علشان تبقي عروسة زي القمر لازم في البداية تاخدي بالك من صحتك يعني تهتمي بالحاجات دي:
• لو هتنزلي تلفي في الشمس يبقى احتفظي في شنطتك بزجاجة مياه وحاولي تشربي على قد ما تقدري لأن الحر والعرق بيفقدوا الجسم كمية كبيرة من المياه وده طبعاً بيأثر على نضارة البشرة ده غير إن المياه بتحفظك من الإصابة بضربة شمس لا قدر الله... وياريت كمان وإنت بتشربي مياه تاخدي لك علبة عصير لأنك هتحتاجي للسكريات بدل ما تدوخي لا قدر الله..
• أثناء عملية اللف والتدوير هتعملي فيها واحدة شيك علشان خطيبك نازل معاكِ وتلبسي صندل طوله مترين يبقى عليه العوض في صحتك وضهرك... خليكِ شخصية عملية والبسي الحذاء اللي يناسبك ويناسب المشوار واللف.. وممكن برضه يبقى شيك وشكله حلو من غير ما يتعبك ويأثر على صحتك.
• زي ما الحذاء هيكون عملي وشيك في نفس الوقت هدومك لازم تكون عملية ومريحة يعني ماينفعش تنزلي تلفي طول النهار وإنت لابسة كلاسيك علشان خطيبك معاكِ لأنه مش هيفيدك بحاجة لما تتخنقي من اللبس والجو يحرر عليكِ والموضوع يقلب بحساسية وعصبية يعني أكيد لو لابسة لبس مريح هتكون الحياة ألطف كتير.
• كعادة بنات مصر المحروسة بيكون فيه حد أدنى لساعات اللف على المحلات والساعات دي في الطبيعي مش بتقل عن 3 ساعات وقد تصل في أكثر الأحوال إلى 6 ساعات فأكثر، وطبعاً الفترة دي تحتاج لفترات مستقطعة للجلوس من وقت للتاني علشان ضهرك ورجليك يرتاحوا شوية وتقدري تستكملي المسيرة... يعني بلاش تتقمصي دور النحلة زينة وتفضلي تلفي وتدوري من غير ما تاخدي نفسك وترتاحي شوية.
• خلي بالك من نزلات البرد اللي ممكن تصيبك من حيث لا تدري ولا تحتسبي يعني مثلاً ترجعي من بره والدنيا مولعة وتقفي بمنتهى البراءة قدام المروحة أو تجري على التلاجة وتشربي زي الشاطرة زجاجة مية متلجة على بق واحد.
• التوتر والقلق بقى دول حكايتهم حكاية وماقدرش أقول لك بمنتهى البساطة بلاش تقلقي لأني أكيد هابقى بضحك عليكِ... لأ اقلقي... أي عروسة في الدنيا لازم تقلق بس قلقها ده لازم يكون في حدود يعني مايوصلش لدرجة إن نومها يبقى متلخبط ده إن نامت أصلاً لأنك لو عشتِ في دور القلق والتوتر بشكل متواصل ممكن توصلي لنتيجة وحشة جداً نفسياً وصحياً لأنك هتبقي عصبية زيادة عن اللزوم وهتفقدي التركيز بشكل كبير... علشان كده حاولي من فترة للتانية إنك تاخدي نفسك بعيد عن الضغوط ولو لساعة في الأسبوع تهدي فيها أعصابك وعندي ليكِ فكرة لطيفة جداً تاخدي حمام مختلف وهاقول لك ازاي:
الحمام اللي هاكلمك عنه دلوقتي قادر على إنه يخلصك من أي آثار نفسية أو توتر لأنه بيهدي الأعصاب وبيخفف التوتر وبيفك الأعصاب المشدودة من كتر العصبية:
المطلوب:
فنجان من زيت اللوز أو زيت الزيتون.
نصف فنجان من العسل.
نصف فنجان من صابون سائل Shower Gel
ملعقة كبيرة من الفانيليا.
تعملي إيه:
اخلطي المقادير بالترتيب بداية بالزيت وانتهاءً بالفانيليا مع التقليب المستمر لغاية ما يمتزجوا تماماً، بعد كده صبي الخليط ده في زجاجة بلاستيك، واقفليها ورجيها كويس قبل الاستخدام. قومي بصب الخليط في ماء دافئ واستمتعي بتلك الرغوة الناعمة الفواحة.
وعلى فكرة الخليط ده هيكفيكِ لأربع مرات يعني ممكن تحتفظي بيه وأول ما تحسي إنك هتتوتري طلعي الخليط وخدي حمامك المنعش.
بشرة فل الفل
تخيلي كده عروسة مش مهتمة ببشرتها ولا بتغذيها ولا بتعتني بيها ولا بتعالج العيوب اللي فيها ولا أي حاجة...!!! أظن ماينفعش... وكمان تنزل وتلف في الشمس من غير ما تلبس حاجة على راسها علشان تحجب الشمس عنها قال مكسوفة من الناس... وطبعاً الكلام ده ماينفعش...
كام نصيحة على الماشي:
• زي ما قلنا قبل كده ماتنسيش شرب المياه وأكل الخضار والفاكهة علشان تحافظي على نضارة بشرتك، ولو تاخدي بالك احنا بنعيد النقطة دي تاني علشان نأكد على أهميتها.
• النوم بدري مهم لبشرتك علشان تتفادي ظهور الهالات السوداء.
• حاولي تقللي من الماكياج علشان تريحي بشرتك شوية وتديها فرصة تتنفس. وياريت بلاش ماكياج خالص لو هتخرجي الصبح في الشمس.
• بلاش تنامي أبداً من غير ما تشيلي الماكياج من على وجهك بالكامل.
ودي شوية وصفات طبيعية لعلاج بعض عيوب البشرة:
نشا وماء ورد للمسام الواسعة:
لو مسام وجهك واسعة وبتبان بشكل ملحوظ يبقى القناع ده هيفيدك جداً...
اخلطي 4 ملاعق ماء مع ملعقة نشا وملعقة ماء ورد وحطيه على النار مع التقليب لغاية ما يتقل شوية، وبعدين سيبيه يبرد وحطيه على وجهك لمدة 20 دقيقة.
اللوز لإزالة الخلايا الميتة:
لو عايزة تتخلصي من الخلايا الميتة في جسمك جربي الوصفة دي...
اخلطي ثلاث ملاعق لوز مطحون مع ثلاث ملاعق زيت لوز وملعقتين عسل. حطي الخليط على وجهك واستمري في دعكه لمدة عشر دقائق وبعدين اشطفيه.
كمادات لانتفاخ الجفون والهالات السوداء:
استخدمي كمادات الشاي الدافئ وضعيها فوق جفنيك واتركيها لمده عشر دقائق ثم اغسلي وجهك بالماء البارد.
سكر لتنعيم البشرة:
نصف كاس سكر مع ملعقتين كبار خميره فورية عليهم شوية زيت زيتون وملعقة ملح مع عصير الليمون..
كل ده يتخلط مع بعضه ودلكي به البشرة لمدة 15 دقيقة ويتشطف بعد كده.
الجلسرين لتفتيح البشرة:
الليمون مع الجلسرين -موجود عند العطار- أحسن طريقة لتفتيح البشرة بس المهم الاستخدام المتكرر.
لتفتيح الكوعين:
عسل على عصير ليمون مع زيت اللوز أو الزيتون يتخلط ده كله وتدهن الكوعين.
تلج وبخار وعمق
في نوعين من أنواع الحمامات اللي بتتعمل للبشرة للتنظيف العميق واحد اسمه حمام البخار وواحد اسمه حمام التلج يمكن يكون البخار معروف أكتر من التلج، ولكن ده مايمنعش إنه لا يقل أهمية أبداً...
حمام البخار
أهميته:
1. تنشيط الدورة الدموية في البشرة.
2. تفتيح المسام للتخلص من أكبر قدر ممكن من الإفرازات الدهنية والرءوس السوداء.
المطلوب:
1. شيح "عند العطار".
2. مياه.
3. فوطة كبيرة.
الطريقة:
1. سيبي الشيح يغلي في حلة متوسطة الحجم.
2. قربي وجهك من الحلة بس مش قوي علشان النار ماتمسكش في هدومك لا قدر الله.
3. حطي الفوطة على راسك وافرديها بحيث تبقى إنت والحلة تحت الفوطة، وبرضه خلّي بالك من النار، ولو مش هتعرفي تخلي بالك يبقى من الأحسن تغلي المية وبعدين تشيلي الحلة في مكان آمن وتقومي بالخطوة السابقة.
4. سيبي البخار يتسرب لبشرتك لمدة 10 دقايق وطبعاً لو تعبتِ في النص ابعدي وشك عن البخار وماتعمليش فيها بطلة.
5. امسحي بشرتك بإسفنجة ناعمة مبلولة بميّة ساقعة.
حمام التلج
أهميته:
1. علاج احمرار العين.
2. علاج السواد تحت العينين.
3. الشعور بالانتعاش.
المطلوب:
1. قطعة تلج صغيرة.
الطريقة:
امسكي بقطعة التلج ومرريها على وجهك في حركات دائرية سريعة هتحسي بالقشعريرة في البداية بس بعد شوية هتتعودي واستمري لغاية ما التلجة تدوب وأول ما تخلصي هتلاقي وشك بقى لونه وردي وهتحسي إنه منتعش جداً
العناية بالشعر مهمة جداً طبعاً سواء كنتِ مش محجبة أو محجبة لأنك بتهتمي به لنفسك قبل ما يكون للناس وهاقول لك ازاي تهتمي به وليكِ عندي:
كلام ع الماشي:
1. قومي بتمشيط شعرك الصبح وبالليل، وخصوصاً قبل غسيله لأن الشعر بيكون ضعيف وأكثر عرضه للتقصيف وهو مبلول وكمان علشان تتفادي تعقيد الشعر بعد غسيله.
2. مشطي شعرك بالراحة بلاش القسوة لأن تمشيط الشعر بقوة بيقصف الشعر وبيوقعه.
3. إذا كان شعرك مجعّدا، احرصي على استعمال المشط اللي أسنانه متباعدة وعريضة علشان ييسهل عليكِ فك عقد الشعر.
4. مهما كانت طبيعة شعرك ونوعيته، فمن الأحسن إنك تستخدمي المشط اللي أسنانه طرفها مدور ومش مدببة لأنه بيساعد على تدليـك منبت الشعر من غير جروح ده غير التخلص من القشرة وزيادة نمو الشعر.
5. لو مضطرة تمشطي شعرك وهو مبلول يبقى لازم تستخدمي مشط سنانه عريضه جداً علشان تتفادي تساقط الشعر.
6. بلاش تاخدك الحماسة وتفضلي تسرحي في شعرك طول النهار، علشان التمشيط الكتير هيؤدي إلى زيادة تنشيط الغدد الدهنية الموجودة تحت جلد الرأس، وبالتالي هيزيد إفراز الدهون تحت الجلد وهيبقى الشعر مزيت وشكله وحش وهيلم التراب والدنيا هتبقى مش لطيفة خالص.
7. لو لازم تستخدمي السيشوار يبقى من الأحسن إنك تنشفي شعرك الأول بالفوطة وبعدين تقسمي شعرك وتبدئي تنشفيه بالسيشوار.
8. اهتمي بقص أطراف الشعر مرة كل شهرين علشان تحافظي على نموه من غير تقصيف.
9. اعملي تمارين لجدور الشعر وده عن طريق تدليك منبت الشعر تحت المياه الباردة بطريقة دائرية وبالراحة برضه، يعني بلاش تتعصبي على شعرك وده بيساعد على تقوية جذور الشعر.
10. احرصي على تنظيف مشطك وفرشتك باستمرار علشان تتجنبي القشرة والأتربة.
شوية وصفات:
دي شوية وصفات جابتها لنا "منى صلاح الدين" من الطبيعة علشان تساعدك في حل بعض مشاكل الشعر..
لتطويل الشعر
اطحني 3 ملاعق كبيرة من الترمس وانقعيهم في كوبايتين ميه سخنة من الصبح لغاية الليل (طبعا الكمية دي قابلة للزيادة حسب طول الشعر).. بعد كده صفيه وادهني بيه شعرك وسيبيه عليه من الليل لغاية الصبح بدون شطف وده لمدة 10 أيام.. وعلى فكرة الوصفة دي بتساعد على فرد الشعر المجعد كمان، ولو كنت عايزة تتجنبي إن الترمس يلصق في شعرك لفيه في شاشة ثم انقعيه...
لشعر صحي و لامع
دوبي 3 ملاعق عسل في كوباية مية سخنة وسيبيها لحد ما تبقى دافية وبعد ما تستحمي حطيها على شعرك.. وسيبيه على شعرك من غير غسيل.. كرري الطريقة دي بعد كل حمام باستمرار.. ودي كمان طريقة.. اخلطي صفار البيضة مع ملعقتين زيت زيتون وملعقة خل تفاح (ممكن تزودي الكمية) وحطيهم على شعرك مدة نص ساعة أو أكتر حسب ما تحبي وبعد كده اغسليه .."
لشعر قوي
بعد ما تغسلي شعرك بالشامبو اخلطي 3 ملاعق كبيرة زبادي مع بيضة واحدة وحطّيه على شعرك بدءاً من الجذور لغاية الأطراف، وسيبيه 5 أو 10 دقائق، وبعدين اشطفيه بماء بارد، كويّس قوي.
بس يا ست العرايس احنا بدأنا النهارده بشوية وصفات تجميلية علشان تبدئي من دلوقتي تعتني بنفسك
