كيفيه تعويد الطفل على ترك البامبرز واستخدام التواليت

بسم الله الرحمن الرحيم
السلام عليكم ورحمه الله وبركاته

طبعا انا بلاقى اسئله كتير من الامهات ازاى يعودوا اولادهم انهم يعملوا بيبى لوحدهم ويسيبوا البامبرز كنت بدخل وافيدهم بس قلت الافضل اعمل موضوع منفصل عشان الكل يستفيد وبتمنى انه يتثبت عشان الامهات تتعلم من تجربتى سعيدة قوي

اولا واهم حاجه


علمى ابنك اوبنتك فى الصيف مش الشتاء دة هايسهل الموضوع طبعا احنا عارفين ان دخول الحمام بيزيد فى الشتاء عن الصيف فهيبقى اصعب لو علمنا اولادنا فى الشتا

ثانيا

بصى هاقولك انا عملت ايه مع بنتى بس انا بدات معاها فى سن سنتين وهى دلوقتى 3سنين و7 شهور ما شاء الله وانا شايفه ان دة وقت مناسب لتعليم الطفل ليه ؟؟؟؟؟؟

عشان الوقت دة الطفل بيعرف يعنى ايه انتى زعلانه منه يعنى ايه فرحانه يعنى ايه هديه وكدة

انا اول حاجه عملتها جبت لبنتى اعزكم الله بوتى (نونيه) شكله حلو اوى عبارة عن كرسى وفيه موسيقى صحيح غالى بس حلو هايستحمل للبيبى التانى كمان باذن الله ودول موجودين فى التوحيد والنور او عند اى واحد بيبع بلاستيكات

تعالى اقولك ازاى تعلمى بنتك (ابنك) يسيب البامبرز (من تجربتى)
كمان وحطيته فى الانتريه ماتستغربيش الانتريه بالنسبه لى غرفه معيشه يعنى بقعد فيها كتير عشان كدة حبيت تكون ادام عينيا
وشيلت البامبرز وبقيت كل شويه اسالها ( عايزة تعملى بيبى ) كل شويه ولما تعمل فى هدومها اوريلها الهدوم واقولها شوفى هدومك مش نظيفه ازاى
شوفى الارض مش نظيفه ازاى

انا زعلانه منك ومش هاكلمك وفعلا مابكلمهاش شويه لغايه حتى ماتحس انى زعلانه بس بلاش الشخط والضرب فى الحاجات دى احسن تعمليلها لا قدر الله عقدة

وبحاول كل شويه ااقعدها على البوتى حتى لو مش عايزة تعمل ولما تقعد اديها استيكر تلزقه على البوتى بايدها
وبعد كدة مرة فى مرة بدات لما تحس انها عايزة تعمل بيبى تروح بسرعه للبوتى صحيح فى الاول مابتلحقش والشقه بتبقى زفت بس برضه كنت بشجعها ومرة فى مرة عرفت ما شاء الله وبقت تروح بهدومها تقعد على البوتى وبرضه كنت بشجعها واديها استيكر تلزقه واوقات كنت بطلع فوق كنبه الانتريه واصقفلها اوى انا وبابها فتعرف انى فرحانه ولما تعمل فى هدومها ازعل منها
واقولها انى مش هاديها استيكر وانها وحشه واكشر فى وشها وكل ماتتفرج على اى حد بيعيط فى التليفزيون كبير ولا صغير اقولها انه بيعيط عشان مامته ضربته عشان عمل بيبى فى الارض او فى الهدوم
لدرجه انها حتى لو شافتنى بعيط زعلانة و باعيط بتقولى انتى بتعيطى عشان عملتى بيبى فى الارض ؟؟؟؟ :)

اما بالنسبه للخروج استنى شويه عليهم يعنى لو مسافرة او خارجه وحتى لو اتعودوا فى البيت لابسيهم فى الخروج بامبرز بس قبل ما تخرجى خليهم يعملوا بيبى ونبهيهم ان لو حب يعمل بيبى يقولك
اول ماتحبى تجربى تشيلى البامبرز برة يكون مشوار قريب او مشوار عارفه انه فى حمام ممكن يدخله

مرة فى مرة هايتعود باذن الله

لما تلاقيه بدا برة يقولك انه عايز يعمل بيبى ممكن فى الوقت دة تشيلى البامبرز وانتى مسافرة معاة بس لازم تعملى حسابك انه ممكن يطلب وممكن توقفى العربيه فى اى مكان لانه مش هايستحمل مسافات طويله

بالنسبه لفترة الليل والنوم

اول حاجه قبل النوم بحوالى ساعه مايشربش اى حاجه مهما كانت
حاولى كل نص ساعه تصحيه وتشيليه وتحطيه على البوتى معلشى هاتتعبى فى الاول لكن مرة فى مرة الوقت هايطول
طبعا ماتنسيش تطى مشمع تحته فى الاول عشان لا قدر الله لو عمل بيبى واوعى تزعقى او تشخطى فيه لو عمل بيبى على السرير بالليل لان دة شىء خارج عن ارادته
مرة فى مرة هايتعود ان شاء الله وانتى مرة فى مرة هاتلاقى بيصحى لوحدة ويطلب دة


بالنسبه لموضوع لا مؤاخذة البراز
بنلاقى اولاد كتير مش بيعرفوا يعملوا الا فى البامبرز وكانت بنتى من النوع دة متصورة انه اصلا عيب انها تعمل بيبى كى
كنت بعمل ايه وماتستغربيش كنت بدخلها الحمام معايا وتشوفنى وانا لا مؤاخذة بعمل بيبى وافهمها انه عادى ان احنا نعمل فى البوتى مش عيب مرة فى مرة بدات تتعود

بصى لازم الصبر ثم الصبر ثم الصبر ولازم تعرفى ان فى اطفال مش بتقدر تتحكم فى عضلاتها الا فى سن متاخر يعنى ممكن يوصل ل4 سنين يعنى ماتستعجليش وماتبوصيش لواحدة ابنها ولا بنتها اتعلمت بدرى كل طفل له ظروفه
[/color]