تفتيح الشفايف الغامقة بوصفات طبيعية من مطبخك

الشفايف الغامقة مشكلة بتقابل كتير من البنات وبتبقى حاجة مضيقانا جدا لان اكيد كلنا بنحب شفايفنا تكون لونها وردي وشكلها حلو وجذاب ومشكلة الغمقان دي بتخلي شكلها مش حلو



, واحنا اتكلمنا قبل كده على مشكلة اسمرار حول الفم وحلها بالوصفات الطبيعية, النهاردة هنحل لكل بنات حوا مشكلة الشفايف الغامقة وجايبين لكم مجموعة وصفات طبيعية فعالة هتساعدكم على تفتيح الشفايف الغامقة وكلها وصفات سهلة وبسيطة ومش مكلفة ومكوناتها موجودة في مطبخنا.

– تعالوا نعرف الاول ايه الاسباب اللي بتخلي الشفايف غامقة:
1- من الحاجات اللي ممكن تسبب غمقان الشفايف هو التعرض للشمس فترات طويلة لان اشعة الشمس زي ما بتأثر على لون بشرتنا اكيد هتأثر على الشفايف كمان وتغمقها.

2- طبعا معظمنا مش بيستغنى عن الروج لكن مشكلة الروج بيأثر على لون الشفايف وبيغير لونها لو احنا بنحطه باستمرار وكمان لو نوع مش حلو ومن الانواع الرخيصة اللي مش معروف مصدرها وبيكون داخل فيها مواد مضره

, عشان كده نحاول اننا منحطش روج طول الوقت نخلي اوقات بطبيعتنا من غير روج عشان نحافظ على شفايفنا, وكمان نستخدم انواع الروج الكويسة والمعروفة عشان منضرش شفايفنا.



3- شرب القهوة والشاي كتير, والتدخين, دي كلها من الحاجات اللي بتأثر على لون الشفايف وبتغمقها, عشان كده على قد ما نقدر نحاول نبعد عن الحاجات دي او على الاقل نخففها.

4- ممكن بقى الغمقان يجي بسبب حساسية مثلا او جفاف الشفايف وخصوصا في الشتا عشان الجو بيأثر على بشرتنا, عشان كده لازم نرطبها باستمرار عشان نحافظ عليها.

– دلوقتي تعالوا نعرف وصفات تفتيح الشفايف:
1- الوصفة الاولى:


ادهني شفايفك بزيت الزيتون وسيبيه لما يتشرب خالص على شفايفك وبعدين حطي عليه ربع معلقة سكر ناعم اول ما تحطيه هيلزق في الشفايف من الزيت سيبي الخليط ده على شفايفك ونامي بيه واغسليه الصبح, كرريها يوميا.

وصفات تفتيح الشفايف

2- الوصفة التانية:
اخلطي كميات متساوية من عصير الليمون والجلسرين والعسل وادهني شفايفك بالخليط ده كل يوم قبل ما تنامي واغسليه الصبح, كرريها كل يوم.

وصفات تفتيح الشفايف
3- الوصفة التالتة:
دلكي شفايفك كل يوم اول ما تقومي من النوم بمعلقة زبادي, كرري الوصفة يوميا بتساعد جدا على تفتيح الشفايف خلال فترة قصيرة.

وصفات تفتيح الشفايف
4- الوصفة الرابعة:

قطعي خيار شرايح وكل يوم قبل ما تنامي حطي الشرايح على شفايفك مع ضغط خفيف ومتغسليش شفايفك بعدها سيبيها واغسليها الصبح, الخيار من الحاجات الفعالة جدا في تفتيح الشفايف, وممكن تستخدمي عصير الخيار يعني اعصرية وادهني بيه شفايفك.

وصفات تفتيح الشفايف
5- الوصفة الخامسة:
ادهني شفايفك كل يوم قبل ما تنامي بزيت اللوز الحلو ودلكي الشفايف بيه كويس وسيبيه طول الليل واغسليه الصبح.

وصفات تفتيح الشفايف

6- الوصفة السادسة:
الزبدة من الحاجات اللي بتساعد على تفتيح الشفايف ومش بس بتفتحها كمان بترطبها ادهني شفايفك كل يوم بالزبدة.

وصفات تفتيح الشفايف

7- الوصفة السابعة:
البنجر من الحاجات اللي بتساعد على تفتيح الشفايف وكمان بتديها لون وردي طبيعي قطعي البنجر شرايح وحطيها في التلاجة شوية وبعدين دلكي بيها شفايفك كذا مره في اليوم, خلال فترة قصيرة هتلاقي شفايفك لونها فتح وبقى لونها وردي.

وصفات تفتيح الشفايف

8- الوصفة التامنة:
اسلقي بطاطس وقطعيها شرايح وافركي شفايفك بيها, البطاطس بتساعد على تقشير الشفايف وتفتيح لونها.

وصفات تفتيح الشفايف
– ودي شوية نصايح عشان نحافظ على لون الشفايف فاتح ووردي على طول:
1- حطي على شفايفك كريم مرطب من اللي بتستخدميه لبشرتك عشان تحافظي عليها من الجفاف ولونها ميغمقش, او حطي لها زبدة كاكاو المهم دايما ترطبيها باستمرار, ومتستخدميش انواع كريمات او زبدة كاكاو رخيصة عشان متضريش شفايفك.



2- اشربي كمية كافية من المية والعصاير الفريش عشان تحافظي على رطوبة بشرتك وشفايفك.

3- افركي شفايفك كل فترة بفرشة السنان بس فرك بخفة جدا لان ده بيخلص الشفايف من الجلد الميت وبيقشرها.

4- دلكي الشفايف يوميا ده هيخليها تحافظ على اللون الوردي.

5- اتجنبي خالص عادة بل الشفايف باللسان لان ده بينشف الشفايف وبيخلي لونها يغمق وبيزود المشكلة.