الجمال والرشاقة

والجسم الرشيق مش هييجي بين يوم وليلة، ده محتاج وقت وصبر وجهد ومحتاج إنك تلغي من قاموس حياتك كلمة مافيش فايدة أو زهقت ولازم تعرفي حاجة مهمة قوي وهي إن الاستمرار في ممارسة التمارين دي هو شرط النجاح في الحصول على القوام المثالي الخالي من أي عيوب.
تعالي بقى نعمل التمارين مع بعض
يلاّ.. واحد اتنين...
تمرين الوقوف على أطراف القدمين

والتمرين ده بيسمى تمرين الوقوف على أطراف القدمين وكل اللي هتعمليه فيه هو إنك تقفي على أطراف قدميك لمدة خمس ثوان مع شد الجسم.. وبعد كده تقفي على رجلك تاني.. وترجعي تكرري الموضوع ده 5 مرات مع مراعاة إن إيدك تكون جانبك وظهرك يكون مفرود.
وعلى فكرة التمرين ده مفيد جدا لأنه بيساعد على شد عضلات الجسم ومنع حدوث ترهلات في الفخدين.
تمرين الأرجـل

اقعدي على كرسي مع مراعاة فرد الظهر بعد كده مدي رجلك اليمنى للأمام ورجعيها تاني إلى وضعها الأساسي..
كرري التمرين 8 مرات لرجلك اليمين و8 لرجلك الشمال والتمرين ده بيفيد في التخلص من مشكلة الكرش وتخسيس منظقة الفخدين والتخلص من ترهلات الفخدين.
تمرين البطن

نامي على الأرض وإيدك جانبك بعد كده اثني رجلك اليمن 8 مرات ورجلك الشمال 8 مرات.. والتمرين ده بيساعد على تقوية عضلات البطن والتخلص من مشكلة ترهلات البطن.
تمرين لشد البطن

وده كمان تمرين تاني لشد البطن والتخلص من ترهلات البطن.. كل اللي عليكِ إنك تنامي على وشك وتحطي إيدك ورا وترفعي رأسك بصدرك عن الأرض لمدة خمس ثوان، وتنزليها تاني.. كرري التمرين ده 5 مرات مع مراعاة إن يكون ظهرك مفرود.. ولو عايزة نتيجة أحسن يبقى ياريت تعملي مع التمرين ده تمرين البطن كمان.
تمرين الأرداف

نامي على بطنك وإيدك جانبك وارفعي رجلك اليمين نص رفعة وبعد كده رجلك الشمال.. كرري التمرين ده 5 مرات لكل رجل.. وعلى فكرة التمرين ده هيساعد على التخلص من مشكلة الأرداف نهائيا.
تمرين لتقوية عضلات الظهر

نامي على ظهرك وإيدك جانبك، وبعد كده قومي بظهرك من على الأرض نص قومة لمدة خمس ثوان، ورجعيه تاني على الأرض.. كرري التمرين ده خمس مرات لأنه بيساعد على تقوية عضلات الظهر.
تمرين الحفاظ على الرشاقة
ولو كنتِ رشيقة وعايزة تحافظي على رشاقتك يبقى مافيش قدامك غير التمرين ده..
الخطوة الأولى

نامي على الأرض وحطي رجلك على الكرة واثني ركبتيك بزاوية 90 درجة... ارفعي كتفيك عن الأرض وحطي كفيك على جانبي ركبتيك.
الخطوة الثانية

افردي رجلك على الآخر وشدي مشطي القدمين وفي نفس الوقت افردي ذراعيك تماماً للخلف وعلقيهما في الهواء.. حافظي على الكتفين معلقين في الهواء لمدة 5 ثوان.
كرري التمرين ده 3 مرات مع العودة إلى وضع الاستعداد ولو ماعندكيش كرة مطاطية زي دي ممكن إنك تستخدمي بدل منها كرسي لأداء التمرين.
دي كانت مجموعة من التمارين الرياضية اللي هتساعدك على الحصول على قوام متناسق..








تمارين لشد ترهلات الصدر

يلاّ واحد اتنين.. مع بعض

التمرين الأول

ده في منتهي السهولة.. كل الحكاية إنك هتحطي تحت رجلك كرة مطاطية مع وضع الذراعين على الأرض والطلوع والنزول بالرأس ومنطقة الصدر عشر مرات.. وخدي بالك إن يكون ظهرك في وضع مستقيم.
التمرين الثاني

حطي ظهرك على كرة مطاطية مع قبض الكفين جيدا حتى تشعري بشد عضلات الأيدي.. افتحي ذراعيك عن بعضهما البعض وضميهم تاني مع مراعاة إن الإيدين تكون متقابلتين عند الرفع.
التمرين الثالث

وده فيه شبه من التمرين التاني لكن الفرق هو الجلوس على الأرض وعند رفع اليدين يجب أن يكون الكفان متجهان للأمام بعكس السابق ...
في حالة عدم وجود الكرة المطاطية ممكن استخدام وسائد .
التمرين الرابع

في التمرين ده ممكن إنك تنامي على أرض ولكن من الأفضل إنك تنامي على حاجة مرتفعة ولو قليلا علشان إيدك ماتخبطش في الأرض أثناء أداء التمرين.
التمرين الخامس

اقفي قدام الحيطة وخدي بالك إن رجليكِ تكون بعيدة عن بعضها والأصابع تكون أعلى بقليل من مستوى الكتف..

بعد كده اثني الكوعين وتوقفي قبل وصول جسمك إلى الجدار واستني شوية، وبعد كده ارجعي تاني كرري التمرين ده عشر مرات...