الكيكة الاسفنجية

دي طريقه عمل الكيكة الأسفنجية بالتفصيل الممل لعمل كيكة كبيرة
لو هتعملي صينية اصغر اقسمي المقادير للنصف
المقادير
10 بيضات (( تكون خارج الثلاجه ))
رشة فانيليا
1 ونصف مج سكر (( mug كوب كبير ))
2 كوب دقيق (( نستعمل نفس الكوب اللي عايرنا بيه السكر ))
منهم 2 ملعقه كبيرة نشا
و لو هنعمل كيكة شوكولاته نشيل ربع كوب دقيق و نحط بدالهم كاكاو
و نحط 1 ملعقه صغيره باكينج باودر
وننخل كل ده مع بعض اكثر من مره

الطريقه

1 -الأول نفتح الفرن علشان يسخن بس الحرارة تكون متوسطة
لازم مضرب كهربائي لأن من شروط نجاح الكيكة اننا نخفقها كثييير جداً
نحط ال 10 بيضات و رشة فانيليا و السكر و نخفق كويس لمده طويله
لحد ما يتغير لونها و ترتفع و تحسي انها جمدت شوية

2 - عند إظافة الدقيق ما نستعملش المضرب الكهربائي و نستعمل ملعقة خشب
أو مضرب بيض يدوي و نقلب في إتجاه واحد بشويش خالص
المهم ...الدقيق نحطه على 3 إو 4 مرات....نرش رشة دقيق و نقلب بشويش
من تحت لفوق و بعدين نحط تاني لحد ما المقدار يخلص
نيجي للنقطة المهمة جداً جداً
الصينية اللي هنخبز فيها - مقاس كبير ( 30 )
نحط فيها ورقه زبده و ندهنها زبده خفيفه
او ممكن متحطيش ورقة زبدة وتدهني الصنية وندهن جوانب الصينية وياريت الصنية تكون عالية شويه علشان الكيكة تاخد راحتها
المهم نحط الخليط بالراحه و نخبط الصينية خبطه خفيفة علشان الهواء اللي فيها يطلع
ندخّل الصينية في الفرن في الوسط و نخللي الحرارة متوسطة لمده 10 دقائق و بعدين نوطي خااااااالص
علشان تستوي براحتها و ما نفتحش عليها لمده نص ساعه والا هتهبط منك ...بعد 45 دقيقه
ممكن نفتح باب الفرن مش للأخر ...يعني نفتحه حتة صغيره نشوف منها بس وش الكيكة
علشان لو فتحنا باب الفرن على الآخر الهواء البارد بيهبط الكيكة
وكمان نقفل الباب بشويييييييش خالص لنفس السبب
لحد ما نلاقي حروفها احمرت ((مش نسيبها تتحرق )) نحط سكين حاد فيها أو خلة إسنان خشب
لو طلعت نظيفه يبقى استوت خلاص...لو طلع فيها شوية عجين يبقى نسيبها تكمل
ارجو ان تعجبكم وانا والله مجرباها وطلعت عالية جدا ما شاء الله