فراخ المنتدي في البيت
كلنا عارفين المندى
وعارفين انه بيتجاب من المطاعم بس
طب لو عايز تعمله في البيت
تعمل ايه
انا هاقولك طريقة (وفيها سر صغير هو اللي هايخلي طعم الاكل زي المندي بالظبط )
المقادير :
الفراخ اللي عندك ( حسب العدد اللي عندك )طبعا
بصلة كبيرة مقطعة شرائح
كوب طماطم معصورة
ملعقتين سمنة
لومى او ليمون مجفف
ورق لورا
جبهان
ملح
كزبرة حب
كارى
جنزبيل
قرفة اعواد او مطحونة
فلفل اسود حب او مطحون
الطريقة :
اقدح السمنة وقطع البصل شرائح طولية وحطه لغاية ما يبقي لونة مصفر شوية
ضيف كل البهارات اللي عندك
بعد كدة حط الفراخ المقطعة النظيفة وحط فوقيها كوب عصير الطماطم
سيبها لغاية ما تستوى
لو الرز بتاعك مصري فلفله عادى خالص
(اما لو بسمتى بتنقعه ثلث ساعة في ماء دافي وبعد كدة بتضيفه علي الفراخ )
انا عندى رز مصرى فلفلته وحطيت فوقيه الفراخ والشوربة بتاعتها اللي لونها برتقالي طبعا من البهارات الي فيها
وخليته يتداخل مع الفراخ ويستوى
قرب السوا جبت جزر وبشرته + فلفل اخضر قطعته شرائح وضفته عليه علي الوش وقلبت علشان يتتداخل
السر بقي اللي يخللي الاكلة دى تفرق عن الكبسة في الطعم وتاخد طعم المندى هو :
هات فحمة وولعها
وهات ورقه الفويل وطبقها
واعمل حفرة في الحلة اللي فيها الرز والفراخ وحط الفويل اللي علي شكل طبق وحط فيه الفحم المولع
وهات حته دهن او رشة زيت وحطها عليه وهو مولع واقفل الحلة كويس بسرعة لغاية ما يكمل سوا الرز
افتح بقي هتلاقي الطعم والريحة احسن الف مرة من المندى اللي بنشتريه من برة
وهاتتدعيلي والله
واللي عايز يعمله باللحمة هايبقي نفس الخطوات
وبالهنا
