طرق الحفاظ على الملابس فى الغسيل
9 حاجات بنغسلها كتير زيادة عن اللزوم, و 9 حاجات تانية عادة بننساها
اوقات كتير ممكن نغسل قطع معينة عدد مرات كتير وهي بتكون مش محتاجة العدد ده من مرات الغسيل, واوقات بننسى حاجات تانية المفروض انها تتغسل اكتر, عشان كده النهاردة من خلال موضوعنا هنقولك عدد مرات غسل الملابس اللي المفروض يكون لكل قطعة عشان تحافظي عليها.
عدد مرات غسل الملابس:
ليه المفروض نعرف عدد مرات غسيل كل قطعة؟ لان في ملابس معينة كتر الغسيل ممكن يأثر على الوانها والنسيج بتاعها ويستهلكها بسرعة وممكن يخليها تنكمنش, بالاضافة ان معرفة عدد مرات الغسيل هيوفرلك في كل حاجة سواء مية, كهربا من استخدام الغسالة باستمرار, مسحوق.
1- الليجينج & الجينز:
الغسيل المتكرر للجينز, بيأثر على لونه, ونسيجه وبيخلي القماش يفقد شكله, بالاضافة ان درجات الحرارة العالية بتزود فرصة انكماش القماش بتاعه وده هيخلي مقاسه يختلف عليكي عن ما اشترتيه, فلو انتي عايزة تحافظي على الجينز بتاعك متحطيهوش ابدا في الغسالة, الجينز بالذات لازم يتغسل عدد مرات قليلة ونادرة جدا.
لكن الموضوع مختلف تماما مع الليجينج, المشكلة في كل الملابس الضيقة ومن ضمنها الليجينج اكيد انها بتمتص العرق بسرعة, وبتخلق بيئة لنمو البكتيريا وده هيأدي لظهور روايح كريهة, فلو انتي بتلبسي ليجينج بشكل يومي او عدد مرات كتير في الاسبوع, فالمفروض انك تغسليه كل 2 – 3 لبسات, ولو بتلبسيه اثناء ممارسة الرياضة يبقى لازم يتغسل بعد كل تمرين.
عدد مرات غسل الملابس
2- حمالة الصدر الرياضية & حمالة الصدر اليومية:
حمالة الصدر اليومية عشان تحافظي على شكلها ونسيجها وتحافظي عليها من عدم التمدد اللي هيخليها متبقاش داعم كويس للصدر, بننصحك انك تغيري حمالة الصدر بشكل يومي وده هيخليكي تغسليها بشكل نادر.
ولكن مع حمالة الصدر الرياضية ده مش هينفع لانها لازم تتغسل بعد كل لبسة.
عدد مرات غسل الملابس
3- مشاية الحمام & الفوطة:
الفوط المفروض تغيريهم وتغسليهم بعد استخدام 3 – 4 مرات, وعشان تقللي عدد مرات غسيلها لمرة واحدة كل اسبوعين, ممكن تستخدمي فوطتين وتبدلي بينهم عشان تدي فرصة لواحدة تنشف وتستخدمي التانية, لو اتجاهلتي القاعدة دي هتبدأي انك تشمي ريحة كريهة من الفوطة, والفوط البيضا لونها هيتحول رمادي من كتر الاستخدام وقلة الغسيل.
مشاية الحمام من الحمام اللي بتتوسخ بسرعة, لانها موجودة في بيئة رطبة وده بيزود فرصة نمو البكتيريا والعفن, عشان كده بننصحك تغسليها مرة كل اسبوع.
عدد مرات غسل الملابس
4- الكاب الصيفي & الايس كاب:
لو بتلبسي الايس كاب طول الشتا, فهيكون كافي غسله كل شهرين في المتوسط او 3 مرات في الموسم الواحد, ومعظم انواعه بيكون سهل انك تغسليه في الغسالة من غير ما يأثر على جودته, ولكن مع ذلك دايما حطي في اعتبارك انك تقري الارشادات اللي مكتوبة عليه.
الكاب الصيف بننصحك غسله مرتين خلال الصيف ويكون غسيل يدوي بمية باردة عشان تحافظي على شكله.
عدد مرات غسل الملابس
5- اكياس المخدات & الملايات:
الغبار اللي بيتجمع على فرش السرير بيحتوي على فيروسات وجراثيم وبكتيريا وكائنات حية ضارة, ومع استنشاقها باستمرار اثناء النوم, ممكن تأدي للاصابة بالحساسية, وصعوبة التنفس, وتهيج الغشاء المخاطي, وخلايا الجلد الميت اللي على بشرتنا تعتبر غذاء لسوس الفراش, وعشان تتجنبي كل المشاكل دي, الافضل غسل الملايات كل 10 ايام.
بالنسبة لاكياس المخدات المفروض تغيريها عدد مرات اكتر من ملايات السرير واللحاف, تقريبا كل 5 ايام, لانه بيتراكم عليها بقايا المكياج, والزهم اللي موجود على البشرة “الزيوت الزيادة”, والبكتيريا, وده ممكن يأدي لظهور حب الشباب والطفح الجلدي.
عدد مرات غسل الملابس
6- البطانية & غطا السرير:
لو بتغسلي غطا السرير مع الملايات, اتوقفي عن ده, لان غطا السرير المفروض يتغسل بشكل منفصل عن الملايات كل شهرين لانه مش بيلمس البشرة كتير.
اما بالنسبة للبطانية بننصحك بغسلها مرة واحدة في الشهر على الاقل.
7- الجاكت & البالطو:
الجاكت المفروض ميتغسلش اكتر من مرة كل 3 شهور في المية الباردة, عادة الملابس الخارجية مش بتتلامس مع البشرة بشكل مباشر, عشان كده مش بتكون محتاجة لغسيل بشكل متكرر, وفي حيلة ممكن تعمليها في الغسيل, انك تحطي مع الجاكت في الغسالة كام كورة تنس عشان تمنعي اي فتل او وبر ينزل من الجاكت.
البالطو لازم تقري تعليمات التنضيف اللي مكتوبة عليه, ومعظم انواع البالطو تقريبا بيكون من الافضل عدم غسلها عشان تحافظي على النسيج بتاعها من التلف, افضل طريقة تنضيف ليها هي الدراي كلين او الغسيل الجاف.
8- المخدة & اللحاف:
الزيوت الزيادة من البشرة والجلد الميت ممكن انها تدخل تخترق المخدة وتسبب تكاثر الفطريات, والحشو اللي جوه المخدة ممكن انه يجذب العته والحشرات اللي ممكن تسبب حساسية لو عقدت فترة طويلة من غير غسيل, لو انتي بتستخدمي اكياس للمخدات يبقى اغسلي المخدة مرة كل 3 شهور هيكون كفاية.
اما بالنسبة للحاف المفروض يتغسل مرة كل 6 شهور, لانه مش بيتراكم عليه حاجات كتير زي المخدة.
9- التل & الستاير:
الستاير السميكة اللي بتكون على جوانب الشباك او البلكونة, المفروض تتغسل مرة واحدة في السنة, بشرط انك تشفطي منها التراب بشكل مستمر وبانتظام, لان ده هيمنع كتير من الكائنات الحية الدقيقة زي عتة الغبار انها تتراكم عليها.
ولكن بالنسبة للتل او الجزء الخفيف في الستارة, بيتراكم عليها الاتربة اللي بتطير جوه البيت من الشبابيك المفتوحة, عشان كده المفروض تتنضف مرة كل 6 شهور على الاقل, وستاير المطبخ المفروض تتنضف عدد مرات اكتر.
ستاير الحمام:
ستاير الحمام بيتجمع عليها بقايا الصابون والمية وبتتطور مع الوقت لبقع مختلفة, لو الستارة مصنوعة من البوليستر او القماش تقدري تغسليها في الغسالة.
ولو اتجمع عليها فطريات, فانتي هتكوني محتاجة الاول تنقيعها كام ساعة في محلول من الخل والمية وتفركي البقع بالفرشة, بعد كده تتغسل في الغسالة على درجة حرارة 60 درجة مئوية واضافة ½ كوباية كربوناتو مع مسحوق الغسيل.
