7 حاجات المفروض متقوليهاش لشخص بيحاول يخس
مشكلة فقدان الوزن تعتبر مشكلة شخصية جدا عند معظم الناس, ولو انتي عندك شخص قريب منك بيحاول انه يخسر وزن زيادة الفترة دي بتكون صعبة عليه جدا, وممكن يبقى ليكي دور في تشجعيه في الفترة دي, لان في اوقات كتير ممكن نقول كلام يجرحهم او يضايقهم من غير قصد, وخصوصا لو انتي ممرتيش قبل كده بزيادة في الوزن
, فمش هتكوني عارفة الاضطرابات العاطفية اللي بيمر بيها الشخص في الوقت ده, عشان كده النهاردة من خلال موضوعنا هنساعدك في المهمة دي, وهنقولك حاجات متقوليهاش لشخص بيحاول يخس, لحد ما يوصل للجسم المثالي.
حاجات متقوليهاش لشخص بيحاول يخس:
1- مش محتاجة تخسسي وزنك:
الجملة دي بنقولها دايما للمقربين مننا سواء حد من الاصدقاء او الاهل بهدف يعني اننا نوصله ان احنا قابلينه زي ما هو وبغض النظر عن الجسم او الوزن, ولكن ده مش صح, لكن الصح ان انتي تشجعي الشخص ده وتقولي لي ان انت كده ماشي صح وبرافو, واسأليه عن خطته للرجيم وازاي ناوي ينقص وزنه وشاركيه
, لكن متقوليش “انتي مش محتاجة تخسسي وزنك”, لان احنا مش عارفين هدف الشخص اللي محتاج يخسس وزنه ده ايه, ممكن يكون محتاج ان يبقى جسمه رياضي اكتر, او عنده مشكلة صحية بتطلب منه انه لازم يخس, عشان كده لازم نشجعهم في كل الاحوال.
حاجات متقوليهاش لشخص بيحاول يخس
2- هل جربتي نظام الكيتو او “اي نظام معين للتخسيس”؟ ده نجح مع “فلان”:
الانظمة الغذائية كتير جدا وكل جسم بيمشي معاه نظام غذائي مختلف عن التاني, يعني مش شرط النظام اللي نجح مع شخص ينجح مع شخص تاني, عشان كده الافضل انك توفري اقتراحك او رأيك لنفسك وتكتفي بس بتشجيعه.
حاجات متقوليهاش لشخص بيحاول يخس
3- مش انتي حاولتي تخسي قبل كده او السنة اللي فاتت؟
طرح السؤال بالشكل ده مش بس بتفكريها انها فشلت قبل كده في فقدان الوزن, ولكن كمان انتي بتحبطيها وبتقولي لها انك مش هتوصلي لهدفك زي ما حصل قبل كده, عشان كده بنقولك متقوليش تعليقات زي دي تكون محبطة او تضايق اللي قدامك
, لان الفترة دي الشخص بيكون محتاج تشجيع وردود فعل ايجابية ناحيتهم, بدل من احباطهم او انك تفكريهم بفشلهم قبل كده, ممكن تسأليها مثلا هي ازاي ناوية تعدل او تغير خطة النظام الغذائي بتاعها.
حاجات متقوليهاش لشخص بيحاول يخس
4- متاكليش ده! انتي مش ماشية على نظام غذائي؟:
مش لازم تتصرفي مع صاحبتك او الشخص اللي بيحاول يخس ده انك “شرطة الطعام” وتقفي له على الواحدة, لان فقدان الوزن مش معناه ان الشخص يتوقف تماما عن اكل الحلويات والحاجات اللي بيحبها لباقي حياته
, ولكن مسموح في الايام الفري بكميات بسيطة, فاكيد مش مستحب انك توقفيه خصوصا لو انتي شايفة انه ماشي على النظام او زود وقت الرياضة عشان يحرق السعرات الحرارية الزيادة اللي دخلت جسمه.
5- خسيتي كام كيلو لحد دلوقتي:
السؤال ده ممكن يخلي الشخص اللي عايز يخس يحس بالاكتئاب, كل جسم مختلف عن التاني, ومش كل الاجسام عندها نفس معدل الحرق, وفي اشخاص كتير ممكن فقدان الوزن ياخد منهم فترة طويلة, او يخسوا بمعدل بسيط جدا
, واشخاص تانية بيكون عندهم فقدان الوزن اسرع, عشان كده بدل ما تسألي الشخص هو خس قد ايه, ممكن تسأليه رحلة انقاص الوزن ماشية معاه ازاي, ده هيخليكي تستفيدي بخبرته وفي نفس الوقت هتوصلي لاجابة لسؤالك بطريقة غير مباشرة ومافيهاش حاجة تضايق.
6- عملت الحاجة الحلوة دي مخصوص عشانك:
اصعب جزء في رحلة فقدات الوزن هو مقاومة الاغراءات, فاكيد متجيش في فترة الرجيم بتاعة صاحبتك وتعملي لها حاجة حلوة هي بتحبها وانتي عارفة انها ماشية على نظام غذائي, عشان كده لازم تراعي اصحابك كويس في الفترة دي, ومتغريهمش بالحاجات اللي مليانة بالسعرات الحرارية, ومتنسيش تشجعي وتقدري جهودهم.
7- بصي انا باكل كل حاجة ومش بتخن:
يعني لو بصينا للجملة هنلاقيها مستفزة, يبقى ليه تقوليها لصاحبتك؟ لكن المفروض زي ما قولنا انك تهنيها على الوزن اللي وصلت له وانها نجحت في الوصول لده وقدرت تعمل كده, لان كل شخص جسمه مختلف عن التاني زي ما قولنا في النقط اللي فاتت
, فممكن جدا يكون انتي عندك نسبة الحرق عالية وجسمك بيقدر يحرق الاكل بشكل اسرع, ويقدر يهضم بشكل اسرع, وبيحرق الدهون بشكل اكبر, واشخاص كتير تانيين بيجهادوا في الموضوع ده ومش بيحرقوا بسرعة, عشان كده لازم تكوني حريصة انك متقوليش التعليقات دي اللي ممكن تأثر على احترام صاحبتك لنفسها.
ودي كانت بعض الجمل اللي المفروض تتجنبيها ومتقوليهاش لاي شخص بيحاول باقصى ما عنده انه ينقص وزنه ويوصل لجسم صحي ومثالي, لو عندكوا اي جمل تانية ممكن نضيفها للقايمة دي شاركونا بيها.
