9 آثار جانبية مضرة لعدم تناول وجبة الفطار
اكيد سمعنا كتير جملة ان الفطار هو اهم وجبة في اليوم, لكن كام واحد بيهتم فعلا بالوجبة دي؟ الحقيقة ان نسبة كبيرة من الاشخاص بيتخطوا وجبة الفطار, ولكن اهمال وجبة الفطار ليه سلبيات وده اللي هنعرفه النهاردة مع بعض من خلال السطور الجايه هنقولك اضرار عدم تناول الفطار.
اضرار عدم تناول الفطار:
1- ليه تأثير سلبي على القلب:
حسب الدراسات اثبتت ان الاشخاص اللي بيتخطوا وجبة الفطار معرضين بنسبة 27% اكتر للاصابة بنوبة قلبية, بالمقارنة مع الاشخاص اللي بياكلوا وجبة الفطار, كمان الاشخاص اللي بيتخطوا وجبة الفطار معرضين بشكل اكبر لارتفاع ضغط الدم, اللي ممكن يأدي بدوره لانسداد الشرايين, وده هيخليهم معرضين اكتر للاصابة بأمراض القلب والاوعية الدموية, وممكن توصل للسكتة الدماغية.
2- ارتفاع خطر الاصابة بمرض السكر من النوع التاني:
الدراسات اللي اتعملت عشان يعرفوا العلاقة ما بين عادات الاكل والصحة, كانت نتايجها ان الاشخاص اللي اتعودوا على تجنب وجبة الفطار معرضين اكتر للاصابة بمرض السكر من النوع التاني, مقارنة بالاشخاص اللي بياكلوا وجبة الفطار كل يوم.
والاسوأ كمان ان الدراسة اثبتت ان النساء العاملات اللي بيتخطوا وجبة الفطار عندهم فرصة اكبر بنسبة 54% في الاصابة بالنوع التاني من مرض السكر.
اضرار عدم تناول الفطار
3- تخطي وجب الفطار ممكن يأدي لزيادة الوزن:
لو انتي ماشية على نظام غذائي لتخسيس الوزن, وعندك عادة انك بتتخطي وجبة الفطار, يبقى لازم تغيري ده دلوقتي, لان الدراسات اثبتت ان الاشخاص اللي بيتخطوا وجبة الفطار عندهم فرصة اكبر في زيادة الوزن.
وده بيحصل لان تخطي وجبة الفطار بيخلي عندك رغبة في اكل الاطعمة السكرية والدسمة, بالاضافة ان الجوع والرغبة في الاكل هتكون شديدة جدا, والامر هينتهي انك هتاكلي اي حاجة هتيجي قدامك, لان كل ما ارتفعت مستويات الجوع عندك هتزيد كمية الاكل اللي هتاكليه, وده ممكن يخليكي تتخطي كمية السعرات الحرارية اللي المفروض تدخل جسمك خلال اليوم, فعادة تخطي وجبة الفطار هتأدي في النهاية لزيادة الوزن مش فقدان الوزن.
4- التأثير السلبي على مستويات الطاقة والمزاج:
حسب الدراسات اثبتت ان تخطي وجبة الفطار ممكن يكون ليه تأثير سلبي على الطاقة والمزاج, وحسب نتايج دراسة اتعملت على 144 شخص, اتقسموا لتلات مجموعات المجموعة الاولى اكلت وجبة فطار كاملة وصحية,
المجموعة التانية شربوا قهوة بس, والمجموعة التالتة ماكلتش وجبة الفطار خالص, لقوا ان المجموعة التانية والتالتة اللي ماكلتش وجبة الفطار اقل في مهارات الذاكرة واعلى في مستويات التعب, بعكس المجموعة اللي اكلت وجبة الفطار كانت في افضل حالتها.
وده يثبت لنا ان تخطي وجبة الفطار ممكن يأدي لانخفاض مستويات الطاقة ويأثر بشكل سلبي على الذاكرة.
اضرار عدم تناول الفطار
5- خطر الاصابة بالسرطان:
تخطي وجبة الفطار ممكن يخلي عندك افراط في الاكل خلال فترة النهار بشكل مبالغ فيه, وده بدوره ممكن يأدي لمشكلة السمنة, والدراسات اثبتت ان الشخص اللي بيعاني من زيادة في الوزن او السمنة بيزيد عنده خطر الاصابة بالسرطان.
6- بيأثر على الاداء المعرفي:
وجبة الفطار في نظامك الغذائي اليومي بتديكي اداء ادراكي افضل, والدراسات اثبتت ان الاشخاص اللي بياكلوا وجبة الفطار عندهم قدرة اكتر على التفكير والتركيز, لان الفطار بيدي الوظيفة المعرفية دفعة وبيحفزها.
7- ممكن انه يسبب الصداع النصفي:
نقص السكر في الدم هو المصطلح الطبي المستخدم للاشارة لانخفاض مستويات السكر في الدم, وتخطي وجبة الفطار بيأدي لانخفاض حاد في مستويات السكر, وده بدوره بيأدي لاطلاق هرمونات عشان تعوض انخفاض مستويات الجلوكوز, وده بيأدي لزيادة مستويات ضغط الدم, وبيسبب الصداع النصفي والصداع.
نسبة الاصابة بالصداع بتكون اعلى مع تخطي وجبة الفطار, لانها اول وجبة بتاكليها في اليوم بعد حوالي 12 ساعة من الصيام, عشان كده لو عايزة مشكلة الصداع تبقى بعيد عنك, اتأكدي من تناول وجبة الفطار.
8- بيسبب تساقط الشعر:
واحد من الاثار الجانبية الرئيسية لتخطي وجبة الفطار هو تساقط الشعر, لانها ممكن تأثر بشكل على مستويات الكيراتين ونمو الشعر وده هيسبب تساقط الشعر, الفطار يعتبر هو الوجبة الرئيسية خلال اليوم وليه دور رئيسي في تعزيز نمو بصيلات الشعر, عشان كده لو انتي عايزة شعرك يكون كثيف وصحي وقوي وبدون تساقط, فلازم تاكلي وجبة فطار غنية بالبروتين يوميا.
9- ممكن يأثر على التمثيل الغذائي:
هل ممكن العربية تشتغل من غير بنزين؟ اكيد لا, بالظبط الجسم محتاج لوجبة الفطار عشان يدي عملية التمثيل الغذائي او الحرق بداية سريعة, لان الفطار زي ما قولنا هو اول وجبة في اليوم بعد توقف عن الاكل او صيام حوالي 12 ساعة, والدراسات اثبتت ان الاشخاص اللي بياكلوا وجبة الفطار عندهم مستويات اعلى من التمثيل الغذائي او الايض.
