5 اخطاء كلنا بنعملهم واحنا بنستخدم الموبايل
اكيد دلوقتي كلنا مش بنقدر نستغنى عن الموبايل, ومعانا طول الوقت ومش بيفارق ايدينا لحد وقت النوم, وهنا الخطورة ان الموبايل ليه اضرار وتأثيرات سلبية ممكن يسببها لنا طول ما هو قريب مننا طول الوقت,
وممكن يأذيكي خلال اليوم بطرق لا تتخيليها, والنهاردة من خلال موضوعنا هنقولك على 5 اخطاء في استخدام الموبايل لازم تعرفيهم عشان تستخدميه بطريقة صحية ومتسببش ليكي اي اضرار.
اخطاء في استخدام الموبايل:
1- بتنامي وجنبك الموبايل:
الموبايل هو في الاساس جهاز ارسال واستقبال كهرومغناطيسي, وده معناه انه بيخرج منه موجات راديو, والموجات دي ممكن تأثر على المخ لو اتعرضتي لها لساعات طويلة,
وابسط حاجة ممكن يعملها انه هيخليكي نوم متقطع ومش مريح مع الاشعارات والرنات اللي ممكن تجيلك كل شوية, فعلى اقل تقدير لو انتي مش قادرة تقفليه خالص او تخليه في اوضه تانية بعيد عنك اثناء نومك, يبقى حاولي تخليه على وضع الطائرة اثناء النوم.
اخطاء في استخدام الموبايل
2- التعرض للضوء الازرق لفترة طويلة:
الضوء الازرق اللي خارج من شاشة الموبايل بيمنع افراز الميلاتونين, وده الهرمون اللي بينظم النوم, وده سبب تاني يخليكي تبعدي الموبايل عنك وانتي نايمة, بالاضافة ان الضوء الازرق ده بيسبب مشاكل العين والنظر, عشان كده بننصحك انك تحاولي تعملي اعادة ظبط لمستوى الاضاءة على تليفونك وتشغليه على فلتر الضوء الازرق.
اخطاء في استخدام الموبايل
3- استخدامه مع اشارة ضعيفة:
لما تلاقي الاشارة او السيجنال بتاعة تليفونك ضعيفة, ده معناه ان التليفون بيخرج اشارة اقوى كجهاز ارسال, وطاقة اكتر خارجة من التليفون معناها ضرر اكتر بصحتك, عشان كده الافضل تخلي الموبايل بعيد عنك بقدر الامكان لما تكون اشارته ضعيفة, كمان الاشارة الضعيفة بتسبب زيادة حرارة التليفون وده خطر تاني.
اخطاء في استخدام الموبايل
4- بتخليه ملامس لبشرتك:
كتير من الدراسات اثبتت العلاقة بين الموبايل والسرطان, لان سخونية التليفون لما هتبقى ملامسة لبشرتك الجلد هيمتص كمية من الحرارة بسهولة في كل مرة هتخليه قريب منك, ونسبة الامتصاص دي بتقل بشكل كبير لما تخلي مسافة مناسبة بينك وبين تليفونك.
حاولي استخدام السماعات او مكبر الصوت اثناء الكلام في التليفون, عشان تمنعي لمس الموبايل لبشرتك بشكل مباشر, ولو مش بتستخدمي السماعات حاولي انك تخلي التليفون بعيد عن بشرتك لادنى قدر من التعرض.
5- النظر للشاشة بطريقة غلط:
حقيقة مثبتة بالدراسات ان استخدام الموبايل بيسبب اصابات الابهام زي التهاب غمد الوتر, وفي حالة صحية تانية ممكن يسببها الموبايل اسمها “الرقبة النصية”, والحالة باينة من الاسم انها بتحصل لما بتحني رقبتك لقدام عشان تبصي لشاشة الموبايل, وده بيزود الضغط على العمود الفقري العنقي بالتدريج.
ومع مرور الوقت, ممكن يكون الوزن اللي هتحسي بيه في رقبتك اكتر من 5 اضعاف وزنك راسك الفعلي, وده بيسبب آلام الرقبة وتشوهات العمود الفقري العنقي, عشان كده بننصحك انك تمسكي الموبايل على مستوى العين, مع الحفاظ على الرقبة مستقيمة قدر الامكان.
