نجل عادل إمام يتذكّر جده الراحل بصورة نادرة

شارك المخرج رامي إمام، الجمهور عبر حسابه الخاص على موقع الصور انستقرام، صورة له بصحبة جده ووالده الزعيم عادل إمام.
وقال إمام الصغير معلقاً على الصورة: "الصورة دي اتبعتت لي من حضراتكم كتير جدا الفترة اللي فاتت، ‏والحقيقة رجعتني حوالي 38 سنة لورا، دي مش مجرد صورة بالنسبة لي، دي من أحب الصور لي، مش لأن ‏فيها 3 أجيال بيتصوروا، لا، لأن فيها جدي الله يرحمه، محمد إمام، الكبير".‏
تابع: "الراجل اللي ما شفتش في حياتي زي حنيته وطيبته وجدعنته وتلقائيته وبساطته وخفة دمه، والأخيرة ‏دي بالذات الظاهر طلعت جينات في العيلة، كنت بحس بالراحة معاه، وأحلي لحظة في حياتي لما كان بيرقيني ‏و يدعيلي، وبيدعي لأبويا روح يا عادل، ربنا يكرمك كمان وكمان".‏
وأضاف: "وفي أواخر أيامه، جاله زهايمر، ومكانش فاكرني، ولا فاكر أي شخص في عيلتنا، ‏تمنيت ساعتها إن الأيام ترجع بي واتصور معاه أكتر وأكتر وأكتر، لحد ما مات سنة 1997، لكن دايما حاسس ‏إنه عايش معايا طول الوقت، ربنا يرحمك يا جدو ويغفر لك وتكون مستريح لحد ما نجيلك".‏