يعنى ايه كيرياتييين بقى ؟؟؟

كلام كتير بدأ يتردد عن الكيرياتين في الفترة الأخيرة.. إيه الحكاية يا ترى هل صحيح ممكن يفرد الشعر لمدة طويلة؟! وإيه الفرق بينه وبين "البيرم"؟! وهل صحيح ممكن يسبب مشاكل على المدى البعيد؟ ده حوار مع أحمد لطفى مصفف شعر
في البداية يعني إيه الكيرياتين؟
يشكل الكيرياتين 90% من تركيب مكونات الشعر يفقده الشعر لعوامل كثيرة منها فرد الشعر بالبيرم والجليد وكثرة الصبغات واستخدام الكريمات والشامبوهات الغلط.. كتر السيشوار والمكواة الحديد.. أو لأسباب وراثية..
ولما الكيرياتين في الشعر يقل فالشعر يبدأ يجف ويقصّف ويهيش وطبعا يتساقط وتقل نسبة الكيرياتين شوية شوية لحد ما نصل إلى 35%...
النهارده ممكن نرجع للشعر الكيرياتين بس "مصنع" من مواد طبيعية وهو عبارة عن تسع أنواع.. فيه شركة برازيلية توصلت لتصنيع الكيرياتين بجودة عالية جدا بعد كده بدأت شركة أمريكية تاخد براءة هذا الاختراع وأنتجته لكن أقل جودة.. تلتها شركة كندية وأنتجت الكيرياتين بجودة أقل من الأمريكية وبعد كده أنتج الكيرياتين دول عربية زي لبنان وغيرها. ومع الأسف ابتعدت الشركات عن مكونات الكيرياتين الطبيعية ودخلت عليه مواد كيميائية لها آثار سلبية على الجسم والشعر.
مع الأسف الكيرياتين الموجود في مصر "لبناني" مش أصلي ويحتوي على نسبة عالية جدا من الفورمالين، وعدد قليل من الكوافيرات بيستخدموا الأصلي..

إيه المشاكل اللي ممكن يسببها استخدام الكيرياتين اللي مش أصلي؟
بجد دي مشكلة كبيرة مادة الفورمالين مادة مسرطنة ومع الأسف بيتم إضافتها بنسبة كبيرة جدا.
إزاي نفرق بين الكيرياتين الأصلي والكيرياتين المقلد "الخطر"؟
أبسط حاجة إن رائحته تخلي العين تدمع وتشعر بحرقان بسبب المواد الكيماوية، وعلى فكرة ريحته مش زي "البيرم".. "الفورمالين" مادة تستخدم في التحنيط عشان الشعرة تفضل على شكلها فترة وجيزة ثلاثة أو أربعة شهور وخلاص.. من الحاجات المميزة الكيرياتين الأصلي إنه يكون عليه موافقة منظمة الدواء والغذاء الأمريكية (FDA) العلامة دي معناها إن المنتج مكوناته آمنة جدا وهو ده المعيار اللي لازم نتعامل به في كل حاجة..
الكيرياتين المقلد بيستمر 3 شهور فقط وبعد كده خلاص بيرجع الشعر لطبيعته تاني.. الأصلي بيستمر في الشعر مدة لا تقل عن ثلاث سنوات كمان والكوافير اللي بيستخدم النوع المقلد بيطلب من الزبونة إنها تتجنب نزول حمام السباحة.

مهم التأكد من العلامة الأصلية للمنتج.. نصيحتي لازم البنت تشوف المنتج قبل استخدامه.
كمان من الحاجات اللي تخلينا نتأكد إنه أصلي أن يكون الكيرياتين ملمسه واحد متجانس ومن غير حبيبات؛ لأن وجودها دليل على إنه مقلد.
والأسعار؟
الكيرياتين المقلد ثمنه 1500 جنيه أو أقل الكييرياتين الأصلي ذو الجودة العالية ثمنه من 2500 جنيه إلى 5000 جنيه..
هل الكيرياتين أنواع؟
الكيرياتين أنواع.. فيه كيرايتين بيستمر إلى الأبد بيخلي الشعر ناعم وحتى الشعر الجديد بيطلع ناعم خالص بنسبة 60%؛ لأنه بيعلي نسبة الكيرياتين الطبيعية في الجسم. النوع التاني يعني فرد وعلاج ده أغلى نوع؛ لأنه بيكون مرة واحدة وخلاص. وفيه نوع تاني للعلاج بس..

وفيه أنواع حسب رغبة البنت. فيه بنات بيحبوا يكون شعرهم مفرود جدا من غير أي تموجات.. وفيه بنات تحب يكون شعرها مموج، حسب الاساتيل اللي الواحدة عايزاه... وفيه بنات عايزين الكيرياتين للعلاج فقط.
نصيحتك للشعر المعالج بالكيرياتين؟
استخدام شامبو معالج باستمرار عشان تحافظ على شعرها ولازم تصبر شوية لحد ما شعرها يتعود على نوع الشامبو. صحيح الشعر في الأول هيكون هايش لكن بعد كده هيطرى ويتحسن مع الوقت.
الموضة في استخدام الكيرياتين؟
أفضل على المستوى الشخصي الشكل الصحي للشعر ويبهرني الاستايل الإيطالي التموجات الواسعة الكيرياتين يمكن إنه ينفذه بشكل جميل جدا، وعلى فكرة موضة جدا أكتر من أن يكون الشعر مفرود وخلاص.. بدون شكل لكن في النهاية دي حرية شخصية حسب رغبة البنت.