شعرى ضنايا .... سامحنى :) الحلقه الاولى
شعري حبيبي : سامحني
مين فيكم عايزة تقول لشعرها كده؟؟؟
اكيد كتيييييييييييييير
لان فعلا شعرك هو ابنك اللي مخليفتيهوش
متفقين؟؟؟؟؟
ولازم تربيه كويس علشان يكبر بصحه وحيوية ويقدر يساعدك
يساعدك تكوني اجمل واحلى ده تاج جمالك
هترصعيه بالماس ولا الزجاج باللؤلؤ ولا البلاستيك
كل ما تهمليه كل ما هيطفش منك ويسيبك ويمشيفي نص هدومي
لازم تدلعيه وتطبطبي عليه وتنيميه وتاكليه وتحميه وكل فترة تجيبيله لعبه جديده
ايوة بتكلم عن شعرك اللي هو زي ابنك زي ما اتفقنا
اي حد عنده اعتراض؟؟؟؟
المشكله ان نتيجة التربية الصحيحه مش بتظهر في يوم وليلة لا ده سنين طويلة
ده كائن حي يتغذى ويتنفس ويعيش ويتعايش ويقع ويتعور وبيموت كمان
علشان كده بنزهق ونطنشه لا وايه منتظرين منه يكبر ويتربى لوحده
منتظرين الصحه واحنا كل يوم نضربه علقه متينه بالمشط البلاستيك
والفرشه ام 2 جنيه ونصا
ونربطه في راسنا بمنتهى القسوة كانه هيجري ويروح لحد تاني
متخافوش هو فعلا هيروح بس للموت مش لحد تاني
وهيطفش من حبستك ليه
وبدل ما ندلعه ونغيرله جو نحرقه بالصبغه والهايلايت والفرد
ماهو مش بيتكلم ولا بيعيط
بس احنا اللي بنعيط في الاخر
وعلشان الموضوع كده مش شهر ولا اتنين
عايزاكي تعتبري انك حامل في شعرك
وشوفي هتعملي ايه؟؟
اول حاجه الغذاء اكيد مش هتاكليه وهو في بطنك لا انت اللي هتاكلي كويس
اكلك العادي بس علشانه زودي طبق سلطه في كل وجبه(ميستاهلش؟؟؟)
حتر الريجيم مش هيتاثر
وفيتامينات طبعا امال يتولد ضعيف؟؟
لو انت حامل حقيقي هتروحي للدكتور كل اسبوعين او شهر تعملي سونار
لكن حامل في شعرك سهله وانت في البيت حمام زيت جامد جدا من بتوع قسم الشعر
لو حامل حقيقي هتدهني بطنك كل يوم ببانثينول او زيت جنين القمح علشان الخطوط البيضا
وانت حامل في شعرك لازم بردو تدلكي الفروة يوميا حتى لو من غير حاجه شوفي مسكين ازاي؟؟
وهيكون ممتن جدا لحضرتك
وهكذا لغاية الولاده
هتولديه وترميه مع نفسه لا طبعا؟؟؟
التربيه الصحيحه مهمه جدا
ده تشبيه بسيط علشان اقربلكم الفكرة
انا مش عايزة ارصلكم معلومات
المعلومات كتييير وكلنا عارفينها المهم التنفيذ
انا عايزاكم تغيروا من طريقة التعامل مع الشعر
واحده واحده
النصيحه الاولى
لازم نتفق على سيم انا مش هقول شعرك ابدا هقول ضناكي
علشان احنن قلبكم عليه
هتحبيه يعني هتحبيه
نظامنا هيكون كالاتي:
كل يوم هكتبلكم نصيحه واحده بس
علشان اتاكد انكم نفذتوها
وحفظتوها وتمام
وخلال اليوم
هستنى تطبيقكم لنصيحة اليوم اللي قبله ولو اي استفسار في اي شيء
ممكن تكون حاجه انتو عارفينها بس مش بتعملوها
وانا قلت الغرض من البرنامج التنفيذ وليست المعلومات فقط
يعني مش هعطلكم انكم تدوروا لاكون حطيت نصيحه هنا ولا هنا
عرفتوا الميعاد خلاص
طبعا النهارده خلص خلاص بس اول حاجه هنطبقها
هي تسريح ضناكي
لو مغسول
لازم ينشف تحت الفوطه ربع ساعه وبعدين تسرحيه من تحت لفوق بمشط واسع يعني تحت الاول وبعدين تطلعي شوية شويه علشان ميتقطعش
بلاش القسوة براحه عليخ ده ضناكي
طبعا المشط الخشب ضروري جدا جدا جدا لو ناشف لكن لو مبلول ممكن جدا البلاستيك
لكن لو مش مغسول وده اللي قصدي عليه
تسرحيه من تحت لفوق لوملبك ولما يتسلك تسرحيه من فوق لتحت جزء جزء وبحنيه وحب براحه خالص لانك كده بتنقلي الزيوت المفيده جدا اللي بتفرزها فروة الراس لباقي شعرك وبتنشطي الدورة الدمويه في فروة الراس
وده يجعل نمو الشعر اسرع
التسريح يكون 100 مرة لكل جزء يعني حوالي خمس دقايق
واستنو بقيت الحلقات ان شاء الله
