حيل للروج هتخليه يثبت معاكي لفترة اطول

الروج او احمر الشفايف مهما كان ثباته او مكتوب عليه انه بيثبت فترة طويلة, هتحتاجي بردو للمسه او تجديد ليه في نص اليوم, خصوصا لو اكلتي او شربتي حاجة, عشان كده النهاردة احنا هنقولك على حيل لتثبيت الروج فترة طويلة, والحيل دي هي من اشهر خبراء مكياج الفنانين اللي دايما بيستخدموها.

حيل لتثبيت الروج فترة طويلة:
1- تثبيت الروج بالايشادو:


اكيد لاول لحظة كده هتفكري ازاي تستخدمي الايشادو وهو ملون لتثبيت الروج, هنقولك دلوقتي بالخطوات ازاي تستخدميه.

الخطوة الاولى: اول خطوة قبل اي حاجة انتي محتاجة تجهزي شفايفك كويس قبل الروج عشان يبقى شكلها ناعم والروج يطلع شكله احلى, ممكن تستخدمي اي سكراب جاهز متوفر عندك, او تستخدمي سكراب طبيعي ممكن سكر وزيت زيتون او زيت جوز الهند, ده هيساعدك على ازالة الجلد الميت, بعد السكراب حطي على الشفايف طبقة من زبدة الكاكاو, وتكون بلون شفاف عشان متأثرش على لون الروج النهائي.

وخدوة تحضير الشفايف دي هنعملها قبل اي طريقة لتثبيت الروج, يعني دي تعتبر خطوة اساسية قبل الروج.

الخطوة التانية: الخطوة دي مهمة جدا لان لو معملتيهاش ممكن الروج ميدومش فترة طويلة زي ما احنا عايزين, هاتي منديل وبخفة اوي ابدأي اضغطي بيه على الشفايف, لازالة اي زيادة من زبدة الكاكاو, لان شفايفك المفروض تكون مترطبة ولكن مش رطبة او مبللة.


الخطوة التالتة: دلوقتي جت خطوة الايشادو, باستخدام فرشة مسطحة, خدي من اي ايشادو بودر عندك من اختيارك كمية على الفرشة, وامزجيها على الشفايف كويس, وكل ما زودتي الايشادو هيدي ثبات للروج اكتر, ومتخافيش من زيادة طبقات الايشادو.

للحصول على لون كثيف اكتر, بعض خبراء المكياج بينصحوا انك تحطي طبقة زبدة كاكاو وبعدها طبقة الروج, وبعدها طبقة ايشادو بنفس درجة الروج.

حيل لتثبيت الروج
2- تثبيت الروج بالبودر:
الطريقة التانية لتثبيت الروج هي باستخدام البودر السايبة, ممكن تستخدمي البودرة السايبة لو متوفرة عندك, او تستخدمي المضغوطة العادية, اول حاجة حطي طبقة من الروج, وباستخدام فرشة مسطحة حطي طبقة بودر فوق الروج وسيبيها لمدة من 3 – 5 دقايق وبعدين شيلي اي بودرة زيادة, وبعدها حطي طبقة روج تانية.

حيل لتثبيت الروج

3- تثبيت الروج بكريم الاساس:
باستخدام صوابعك او بفرشة مكياج مسطحة, خدي طبقة خفيفة من كريم الاساس, وحطيه على الشفايف, وبعدها حطي الروج باي لون تختاريه, الطريقة دي كمان من الطرق الفعالة جدا في تثبيت الروج فترة طويلة.

وممكن كمان تستخدمي بدل كريم الاساس كونسيلر بنفس الطريقة.

حيل لتثبيت الروج

اللي عندها طريقة تانية غير الطرق اللي احنا قولناها بتستخدمها لتثبيت الروج وبتجيب معاها نتيجة فعالة, ممكن تشاركنا بيها.