خليكي ناصحة و ابعدى العين..هو احنا ناقصين

خليكي ناصحة و ابعدى العين..هو احنا ناقصين حسد!!

مافيش ,لا حتى الحمدلله ونسكت!!..ولا تمام قشطة شغال..؟؟ لا ازااااى ويقولوا انك فرحانة..!!!

انا اقصد بالكلام ده اى واحده تتجوز تسأليها “اخبارك ايه؟؟ ها الجواز حلو؟؟ عاملة ايه؟؟” الاجابة الشائعة: “ياشيخة بلا وجع دماااغ..استمتعى بوقتك بلا جواز بلا مسئولية”..والاجابة الاقل “الحمدلله” وده طبعا مع ايماءة تدل على الهم والقرف برده..اما الاجابة النادرة جدا انها تقولك “الحمدلله تمام مبسوطة”

..خايفة من الحسد يا بيضة؟؟ خايفة من ايه عملتى انجاز؟؟ ولا طفرة؟؟ عملتى اللى محدش عمله قبلك؟؟ عااااادى اتجوزتى..وبعدين تعالى هنا .. لما الجواز زفت وطين وهم ومسئولية وحاجة وحشة ماتتمنيهاش لحد وليعوذ بالله..ليه كل مرة تشوفى وشى تسألينى “هااااا ايه اخبارك مافيش جديد؟” وده طبعا مع غمزة معناها “مافيش عريس”؟؟ او السؤال يكون اكثر غباءا وجهلا “انتى متخطبتيش ليه؟؟” او تقوليلي “هتتجوزى امتى بقاااا؟ (ده لو انا مخطوبة طبعا) كأنى اعده فى نافوخك وانتى اللى بتصرفى عليا انا وخطيبى.

مالكم يابنات؟ اتهبلتوا فى عقلكم؟؟ ولا اتهبلتوا فى عقلكم؟؟ ماتخافوش من الحسد بطريقة مستفزة تنفر الى حواليكم منكم..خليكم عقلانيين ولو خوفتى من الحسد اعملى زى ما ربنا قال واقرأى المعوذتين..وخليكى قريبة من الناس ومتخبثيش عليهم وهما عمرهم ما هيبصولك بصة حسد..

وبعدين احنا لازم نفرق بين حاجتين مهمين يمكن كتير ميعرفوهاش..او عارفينها ومستعبطين..ايه الفرق بين الحسد والطموح..الطموح هو انك عارفة ان الجواز ده حاجة حلوة وانتى عندك طموح انك توصليله مع الشخص الى ترتاحى معاه يعنى بمعنى اصح بتتمنى نعمه معينه سواء البنت اللى بتبعد عنها والحسد وصلتيلها قبلك او موصلتيلهاش فده مش فارق معاها.. لكن بقا الحسد هيا ان واحده بنت حلال تتمنى زوال النعمة اللى انتى فيها واعتقد صعب واحده توصل للاحساس ده الا اذا كانت علاقتها وحشة معاكى وكارهاكى وبينكم وبين بعض مصانع الحداد وساعتها لو كان لسة ليكى علاقة بيها يبقا ساعتها انتى اللى غبية..

مش عارفة اقفل واقول ايه بس ببساطة اهدوا يابنات..متخبثوش على بعض متبقيش ليكى صاحبة مثلا وبتحبوا بعض و تيجي ساعة جوازك تتقلبى عليها وتعامليها زى الغريبة ويكون مبررك الاهبل انك تفاجأيها لان دى مش نيتك الحقيقية نيتك انتى عارفها كويس..ها عرفاها ولا اقولهالك: عايزة تغيظى البنات وتقوليلهم “انا اتجوزت وانتم لأاااااا”..بس انا عذراكى انك عشان تتجوزى فى البلد دى لازم تعانى وتتعبى وتسمعى الكلمتين اللى مالهومش لازمة من اصحاب مامتك فى الشغل و صحابنا اياهم مرضى النقص لغاية ماتنولى الشرف العظيم وهو لقب مخطوبة وبعده الشرف الاعظم وهو انك متجوزة..

ياللا يا ستى بقا افرحى وظيتى وغيظى البنات مهو محدش بياخدها بالساهل… .انما الاعمال بالنيات ولكل امرئ ما نوى..والعمر قصير والدنيا مش مستاهلة الحرب النفسية اللى بتعملوها على بعض..وفى ختام مقالتى المتواضعة احب اقول للى بيحبوا يرخوا العين كلمة اخيرة : “بلا وكسة”.