الحلقة الخامسة - هنجئ نفطر معاكو

داليا : الو
(مامتها اللي علي الخط ): ايه يا دودي انتي فين يا حبيبتي بقالي اكتر من ساعتين بحاول اكلمك محدش بيرد انتي نمتي ولا ايه ؟
داليا : لا يا ماما انام ايه انا كنت في السوق بشترى طلبات عشان الفطار
(مامتها وهي بتضحك) : نزلتي السوق لا مش معقولة !! وعملتي ايه لوحدك في السوق يا حبيبتي عرفتي تشترى
داليا : ايوة يا ماما اهو حاولت اعمل ايه بقه عشان سي احمد يبقي راضي انا عارفة انا كان مالي ومال مشوار السوق ده
مامته : ما انا قولت لكم تفطروا معانا وكنت اريحك من هدة الحيل دي
داليا : يلا بقه يا ماما كان لازم بقه اعتمد علي نفسي واعرف اذاي اشترى طلبات البيت لوحدي ما هو لو كنا فطرنا معاكي انهاردة كان مسيرى برده هاطبخ في البيت مش هانقضي رمضان كله عزايم بره ولا تيك اواي ده بيخرب بيتنا
مامتها : واشتريتي ايه بقه من السوق ؟
داليا : اشتريت حمام وعرق لحمة عشان اعمل لحمة باردة واشتريت كوسة وبطاطس و.....
مامتها : كل ده يا دودي هاتعملي كل ده لوحدك ؟
(داليا هاتعيط ): بس بقه يا ماما متفكرنيش ربنا يعيني احمد متعشم فيا اوي ومش عارفة اعمل ايه ربنا يستر ده طول ما هو قاعد عمال يكلمني علي مامته ونفسها في الاكل وحلاوة طبيخها
مامتها : يا حبيبتي ولا يهمك انا عايزاكي متعمليش حاجة خالص وشيلي كل الحاجات دي في الفريزر
(داليا مستغربة ) : اشيل ايه يا ماما ! انتي بتقولي ايه ؟ اومال هانفطر ايه
مامتها : ما انتي يا روحي كنتي هاتنسيني انا اصلا بكلمك ليه
داليا : خير يا ماما
مامتها : انا وباباكي يا روحي مهنش علينا يعدي اول يوم رمضان وانتي مش في وسطنا قولنا ايه نعملكم مفأجاة ونجيب فطرنا ونجئ احنا نتغدي معاكم بس انتي عارفاني مقتدرش استني قولت اقولك بقه
( داليا فرحانة بس خايفة من احمد ) : بجد يا امي الله عليكي ده احلي مفأجاة بجد بس انتي بتقولي انك كنتي عازمة اخواتي وعمي كمال ومراته وولاده عندكم انهاردة طيب هاتعملي معاهم ايه اوعي يا ماما تكوني هاتعتذرى لهم عشاني لحسن يزعلوا
مامتها : لا يا روحي اعتذر لهم ايه دول عاملين حسابهم خلاص
داليا : اومال يا امي هاتعملي ايه معاهم ؟؟
مامتها : حذري فذرى مش هاتصدقي !
داليا بدأت تقلق مش وقت فوازير خالص ....................
مامتها : انا يا روحي لما قولت لاخواتك قالوا لازم هما كمان يجوا يفطروا ويسلموا عليكي انتي وجوزك وعمك كمال كمان ومراته فرحوا اوي لما عرفوا اننا هانفطر معاكي انهاردة وصمموا يجوا يسلموا عليكم كلها شوية يا روحي وهانجي انا وبابا واخوكي ايمن ومراته وولاده ومها اختك وولادها وجوزها وشريف اخوكي وولاده ومراته وعمك ومراته وولاده
(داليا ماسكة راسها بايديها وضغطها علي ): طيب يا ماما اهلا وسهلا تشرفوا ..................
مامتها : انا مش عايزاكي يا داليا تشيلي هم الاكل انا هاجيب معايا الفطار اللي كنت هاعمله في البيت وهاجيبه معايا ونفطر سوا كلنا في اللمة يا حبيبة ماما
داليا : لا يا ماما ميصحش تعالوا انتوا بس ومتجبيش معاكي حاجة لحسن كده احمد يزعل منكم
مامتها : صحيح يا داليا احمد هايعمل ايه لما يعرف المفأجاة دي ؟؟؟؟
داليا : اكيد هايفرح اوي طبعا ده مش هايصدق خالص يعني
مامتها : طب يا روحي اسيبك انا بقه عشان توضبي نفسك كده عايزة اخواتك وعمك لما يجوا يشوفوكي ذي القمر ده انتي لسه عروسة يا روحي وملكيش دعوة بالمطبخ خالص يلا سلام يا روحي
داليا قفلت السكة مع مامتها وحست بزلزال بيلف في دماغها وبقت تقول الله يسامحك يا احمد اعمل ايه دلوقتي في الجيش اللي جاي ده ما كنت وافقت وفطروا معاهم وخلصنا وكنا فطروا تاني يوم عندك مامتك اديني ادبست في عزومة شعب بحاله اتصرف اذاي يا ربي لازم اكلم احمد افهمه طبعا عشان كمان يعمل حسابه
داليا بتطلب رقم احمد في الشركة وقبل ما تخلص الرقم تقفل السكة وترجع تطلب الرقم تاني اصلها خايفة تكلمه اوي وفي الاخر قالت مبدهاش بقه يلا ضرب الاعور علي عينه وتوكلت علي الله واتصلت واحمد رد
(داليا بخوف ) : الو
احمد : ايوة يا دودا
داليا :اذيك يا حبيبي عامل ايه ؟ واخبارك ايه في الصيام ؟
احمد : اهو شغال بس زهقان وجعان اوي اوي
داليا : اه معلشي هانت بقه كلها كام ساعة وتفطر
(احمد متعشم اوي ) : اه صحيح يا قمر بمناسبة الفطار اخبارنا ايه انا حاسس انك انهاردة هاتغيرى فكرتي اللي كونتها عنك في ال 3 شهور اللي فاتوا وتعميلي مفأجات جامدة في الاكل
(داليا بكسوف ): لا هو من ناحية المفأجات فانا فعلا عملاك مفأجاة جامدة
(احمد فرحان ): بجد يا دودا ها عملتي ايه بصي ابدي الاول بليستة الاكل وبعدين بقه قوليلي ليستة الحلويات
داليا : لا يا بابا هي المفأجاة ملهاش دعوة بالاكل خالص
(احمد بدأ يقلق ): هو في مفأجاة احلي من مفأجاة الاكل عموما ما علينا ها في ايه ؟؟؟
داليا : بص بقه يا احمد بصراحة ومن الاخر ماما كلمتني وقالت لي انهم هايجوا يفطروا معانا انهاردة
احمد : هما مين ؟ مامتك وباباكي يعني ؟
(داليا بحذر): لا مش بالظبط يعني المعني اشمل شوية
(احمد اتخنق) : اشمل ايه وايمن ايه ما تخلصي وهاتي من الاخر
(داليا تعبت من اللف والدوران ) : بصراحة ماما وبابا وايمن اخويا ومراته وولاده وشريف اخويا ومراته وولاده ومها اختي وجوزها وولادها وعمي كمال ومراته وولاده وكلهم كلهم جايين يفطروا معانا انهادرة .................................................
(احمد هايجيله ساكتة قلبية ): .....................مبيردش
داليا : احمد احمد انت مبتردش عليا ليه !!!!!!!!!!!!!
احمد ماسك السماعة وساكت لسه وزمايله لاحظوا انه مش بيتكلم
كريم زميله : ايه يا ابني انت متنح كده ليه في ايه
طارق زميله : ما تنطق يا احمد انت اتخرصت ولا ايه طب ماسك السماعة ليه
(داليا بتصرخ علي الخط التاني ) : ما ترد عليا بقه مش انت السبب مردش تفطر عندهم اديهم جايين كلهم يفطروا معاك يلا استلم بقه بدل ما انت ساكت كده شوف هانجيب فطار ايه عشان العزومة دي ؟
(احمد فاق ): فطار ايه اللي هنجيبوا انتي مش كنتي في السوق وجبتي حاجات ماتتصرفي
داليا : حاجات ايه انت عايزاني اعمل جوز الحمام وعرق اللحمة علي الفطار هايكفي مين ولا مين اساسا شوف هاتجيب ايه معاك وانت جاي
احمد : وبعدين يا هانم انتي بتتكلمي علي الاكل وناسية امي خالص
(داليا باستغراب) : مالها مامتك هو انا قولتلك حاجة عليها !
(احمد بيزعق): ايوة طبعا ما انتي مجبتيش سيرتها ومش حسباها في حسابك خالص يعني امي بعد ما تعزمني وانا ابنها الكبير وارفض العزومة وحتي معزمش عليها تجئ تفطر معانا ، ولما تعرف ان اهلك كلهم فطروا معانا اول يوم رمضان وانا معزمتهاش تفتكري مش هاتزعل مني ...
داليا : يعني تقصد ايه مش فاهمة معني كلامك ؟
احمد : كلامي ملوش غير معني واحد طالما اهلك هايفطروا معانا اهلي كمان لازم يفطروا معانا عشان ميزعلوش
داليا : طيب يا سيدي متزعلش نفسك اذا كان علي باباك ومامتك انا اتصل بيهم دلوقتي واعزمهم
احمد : لا انا هاتصل بامي عشان برده التقدير
داليا : ماشي خلاص ذي ما تحب
احمد : المهم دلوقتي هتعملي ايه في الفطار ؟؟؟
داليا : ما انا كنت بكلم عشان كده ماما قالت لي انها هاتجيب معاها الفطار اللي كانت هتعمله في البيت ونفطر منه سوا
(احمد متشدد ): لا طبعا اوعي تخليها تعمل كده ليه هو انا مش قادر اني افطرهم ولا ايه ولا انا صغير من فضلك يا داليا حذريها اوعه تعمل كده بجد وشوفي انتي عايزة ايه عشان العزومة وانا اجيبه معايا
داليا : في الغالب هيبقي يتك اواي بقه يا احمد عشان مفيش وقت اي اكل جاهز
احمد : طيب خلاص فكرى انتي في الاصناف والكميات وانا هاكلم ماما وارجع اكلمك تاني
داليا : اوك مع السلامة
احمد بيتصل بمامته
مامته : الو....
احمد : ايوة يا امي ها اخبارك ايه وبتعملي ايه عندك ؟؟
مامته : تمام يا حبيبي انا بعمل الفطار
(احمد مبتسم اوي ): لا.لا.لا فطار ايه وتجهيز ايه يا ست الكل اطفئ وقفلي علي اللي عندك
مامته : اقفل واطفئ ليه في ايه هما لغوا الفطار انهاردة ولا ايه ؟
احمد : لا يا ام احمد بس انا يا ستي مهنش عليا افطر من غيرك انتي والحاج اول يوم رمضان قولت يا واد يا احمد اضرب عصفورين بحجر واحد افطر في بيتك الجديد مع مراتك وفي نفس الوقت متحرمش نفسك من قاعدة الحاجة والحاج ، عشان كده قولت اكلمك واقولك لازم تجئ تفطرى معانا انا وداليا
مامته : مش هاينفع يا احمد يا حبيبي خالص
احمد : لا والله يا ماما انا بجد ازعل وداليا كمان تزعل دي كانت عايزة تكلمك
مامته : يا حبيبي علي عيني ما اتحايلت عليك عشان تجئ انت ومراتك ومردتوش
احمد : معلشي يا امي احنا لسه فيها
مامته : اذاي بس ما هو لو عليا انا وبابا نجيلك بس ده اخواتك وصلوا بره يعني اسبهم وانزل
احمد : اخواتي ....
مامته : اه نهلة وجوها وولادها ومعتز ومراته وولاده وخالتك وولادها علي وصول اذا بقه انزل
احمد اتحمق اوي وعرق الشهامة زاد عنده وراسه والف سيف لازم يجوا اشمعني يعني داليا
بصي يا ماما محلولة هاتي اخواتي وبابا وتعالوا علي البيت وانا هاكلم خالتي شكرية واقولها تحصلكم علي عندي ها قولتي ايه مفيش مناقشة خلاص
مامته : يا حبيبي بس كده كتير عليك مراتك هاتتعب اوي طب بص نا هاجيب معايا الفطار اللي كنت هاعمله في البيت ها قولت ايه
(احمد متشدد ): لا اوعي تعملي كده دي داليا تزعل اوي اوي انتي متعرفيش دي داليا من الصبح واقفة في المطبخ انتي ايه عايزها تزعل منكم يلا انتوا بس جهزوا نفسكم
مامته : ماشي يا حبيبي مسافة السكة
احمد ما قفل السكة قال ايه التدبييسة دي امي وابويا واخواتي وخالتي منك لله يا داليا انتي السبب
التليفون بيرن في بيت احمد وداليا
داليا : الو
احمد : ايوة يا داليا ها فكرتي في الاكل اللي انا هاجيبه معايا
داليا : ها مامتك وباباك جاييين عشان ازود في الكمية اكل لفردين كمان
(احمد برده مكسوف من داليا ): اه كلمتهم بس زودي اكل لافراد اكتر شوية
داليا : اكتير اذاي يعني
احمد : اصل ماما وبابا جايين وكمان نهلة وجوزها وولادها ومعتز ومراته وولاده وخالتي شكرية وولادها جايين
(داليا بتصوط ): يا لهوي كل دول حرام عليك يا احمد هو ده الاحتفال اللي هانحتفل بيه في اول رمضان يعدي علينا بعد جوازنا تقوم تعزم لي العيلة كلها
احمد : نعم اشمعني مامتك وباباكي واخواتهم كلهم وعمك جايين وبعدين انا لما عزمت ماما وبابا كان اخواتي وصلوا هناك ايه عايزاني اتجاهلهم ولا يعني يزعلوا مني وبعدين اهو اللمة حلوة مش احسن ما كنا نفطر انا وانتي ذي قرد قطع لوحدينا
داليا : لا بس الشقة هاتقضي مين ولامين وكمان الاكل هانتصرف اذاي
احمد : اهو اللي حصل بقه المهم انا هاتصرف في الاكل متغليش بالك ، ايه رائيك نجيب كباب وكفته
داليا : كباب ، انت عارف الكيلو بكام وكمان احنا عايزين يجئ عشرة كيلو وبعدين بابا مبيحبش اللحمة اوي عشان النقرس ما انت عارف
احمد : اه صح بابكي بيتعب طب فكرى معايا في حاجة تانية
داليا : ايه رائيك في فراخ مشوية ومعاها رز وبطاطس بوم فريت
احمد : بوم فريت ايه وبمب العيد ايه لا مينفعش ماما مبتحبش الفراخ عشان الفلونزا الطيور
داليا : اه صح طب شوف حاجة تانية
احمد : طيب نجيب بيتزا
داليا : بيتزا ايه يا احمد احنا في رمضان مش في سينما
احمد : يووووووووه طب اجيب ايه بقه
داليا : ايه رائيك في اكلت كوارع وبمبار وفتة كده
احمد : انتي عايزة تموتي ابويا يا هانم انتي عارفة ان الدكتور مانع عنه الاكل الدسم عشان الضغط
داليا : لا بقه انت احسن حاجة تسئلهم واحد واحد عن الاكل اللي الدكتور بتاعهم يسمع بيه دي مش عزومة دي غرفة رعاية
احمد :انتي كمان ليكي نفس تهزرى انتي عارفة يا هانم العزومة دي هاتتكلف كام انشاء الله هانشحت طول الشهر وشكلنا كده هانكمل رمضان عندهم في الرعاية
داليا : خلاص بقه يا احمد مكنتش عزومة خلي قلبك ابيض بقه رمضان كريم
(احمد وبدأ يفك شوية ): ماشي يا ستي عشان خاطرك انتي ولا يهمك المهم تبقي مبسوطة
داليا بحنية : ربنا يخليك ليا يا حمادة يا رب ومتحرمش منك ابدا
(احمد منشكح اوى ) : طيب مفيش حاجة طيارى كده عقبال ما نفطر
(داليا بكسوف ): وبعدين خليك مؤدب عشان الصيام ويلا عشان يدوب تنزل تلحق تجيب الفطار
احمد : ماشي يا حبي يلا سلام
احمد قال في باله مرتب الشهر كله هايروح عشان عزومة اول يوم في رمضان مش كنا فطرنا عند امي ولا حماتي احسن يلا ربنا يعدي العزومة دي علي خير..............