7 علامات تقولك انه بيحبك
7 علامات تقولك انه بيحبك حتى لو مقالهاش بشكل صريح
الرجالة والبنات بيظهروا حبهم ومشاعرهم بشكل مختلف, معظم البنات بتقول “انا بحبك” بشكل صريح لما بتحس مشاعر ناحية الشخص, لكن الرجالة مختلفين عن كده ومش بيعبروا عن مشاعرهم بشكل صريح وعمليين اكتر
, وده ممكن يكون محير بالنسبة لك لانك مش بتقدري تعرفي او تحددي او فعلا بيحبك ولا لا, لان الرجالة بيفكروا بشكل مختلف عننا, عشان كده احنا النهاردة هنساعدك من خلال موضوعنا عن طريق 7 علامات تقولك انه بيحبك حتى لو مقالش ده بشكل صريح.
علامات تقولك انه بيحبك:
مبدئيا لازم نعرف ان الحب بالافعال مش بالكلام, لان سهل ان اي شخص يقول كلمة “بحبك”, لكن الحب الحقيقي بيظهر في الفعل.
1- مش بيخاف يقدملك تضحيات:
تقديم التضحيات عشان شخص تاني ده اكيد بيتعمل مع الشخص اللي فعلا يهمنا, لما بنحس مشاعر ناحية شخص بنبدأ اننا نقدم تضحيات وبيبقى في نكران ذات
, وتفضيل الطرف التاني على نفسنا, ونضج, وطبعا الاهم من كل ده اننا بنقدم الحب, والعلاقات بتحتاج ان يكون فيها توازن يعني التضحيات تكون من الطرفين, لانه لو من طرف واحد الطرف التاني مش هيحس انه سعيد.
والرجالة عموما لما بيحبوا حب حقيقي بيحسوا بعدم راحة لو حس انه مش قادر يسعد البنت اللي معاه, عشان كده لو هو بيحبك فعلا بجد هتلاقيه بيقدم تضحيات وبيعمل كل اللي يقدر عليه عشان يسعدك.
يعني لو الشخص ده بيحاول دايما انه يقدم تضحيات عشان يسعدك, دي تعتبر علامة او طريقة بيقولك بيها “انا بحبك” بطريقة غير مباشرة.
2- بيسمع لك:
الدراسات اثبتت ان الستات مستمعين افضل بكتير من الرجالة, فلو لقيتي ان الشخص ده مش بس بيسمعك لا كمان بيتفاعل ويتجاوب معاكي في الحديث, دي تعتبر علامة واضحة جدا انه مهتم بيكي وانك بتعني له وانك حاجة مهمة بالنسبة له.
يعني لو هو مستمع جيد ليكي اعرفي انك بيحبك.
علامات تقولك انه بيحبك
3- بيظهر ضعفه:
الرجالة عادة بيكونوا حريصين جدا انهم يظهروا اي سلوك او يعملوا اي تصرف يبين نقطة ضعف فيهم, وبيحسوا دايما انهم لازم يظهروا بشكل قوي ومثالي.
لكن لما الراجل بيكون في حالة حب حقيقي, بيبدأ انه يترك حذره, وبيبقى حاسس براحة اكتر وبيسمح لمشاعره الحقيقية انها تظهر
, وده يمكن بياخد منه وقت شوية عشان يحصل, لكن مجرد ما ده يحصل ويبدأ يظهر اللي جواه ليكي من غير اي حذر, ده معناه انه بيثق فيكي بدرجة كافية بتخليه يسيب اللي جواه يخرج.
4- بيحبك في كل حالاتك “أسوا ايامك”:
معظمنا اكيد او كلنا تقريبا بنحب اننا نظهر في احسن صورة وبافضل شكل لما نكون مع الشخص اللي حاسين ناحيته بمشاعر معينة
, ولكن لما العلاقة بتبقى اقوى وبتقضوا مع بعض وقت اكتر كل طرف بيبدأ انه يبقى بطبيعته اكتر مع الطرف التاني, ولو الشخص ده بيحبك حب حقيقي في الحالة دي هيحبك بكل حالاتك وحتى في اسوأ ايامك وفي اي مود واي شكل بتكوني عليه.
لان الراجل لما بيحب بجد بيشوف البنت اللي بيحبها حلوة في كل الاوقات بغض النظر عن الحالة اللي هي فيها, عشان كده لو قالك “انتي جميلة” في يوم سيء بالنسبة لك او حاسه ان شكلك فيه مش حلو كالعادة, دي كأنه بيقولك “انا بحبك” بطريقة غير مباشرة.
5- هيكون فخور بيكي:
لما الراجل بيحب بجد, بيظهر ده انه هتلاقيه بيفتخر ويتباهى بيكي, الراجل الحقيقي اللي بيحب بجد مش بيخجل من انه يظهر مدى فخره بيكي.
سواء على مستوى شغلك, او تحقيق اهدافك, يعني اي حاجة بتعمليها مش هتمر من غير ما يلاحظها, ولما يقولك انه فخور بيكي دي هتبقى طريقته اللي بيقولك بيها ” انا بحبك”.
علامات تقولك انه بيحبك
6- بيدافع عنك وبيحميكي:
ده تصرف واضح جدا يقولك ان هو بيحبك لما دايما تلاقيه بيدافع عنك وبيحميكي لو حصلت اي مشكلة.
لان معظم الرجالة عادة بيتجنبوا الجدل والمشاكل بقدر الامكان, عشان كده لو دافع عنك ده تصرف او علامة واضحة جدا وطريقة بيقولك بيها ” انا بحبك”.
7- بيعامل عيلتك واصحابك باحترام:
دي النقطة الاخيرة والاكتر اهمية, من المسلم بيه في اي علاقة, ان الراجل لازم يظهر احترام ليكي ولعيلتك واصحابك بشكل تلقائي, والسبب بسيط, انك تهميه وبالتالي هيعامل كل الاشخاص اللي يهموكي بعناية وباحترام.
وعلى الرغم انه ممكن يكون مش بيحب فرد معين في عيلتك او اصحابك, ولكن هيحتفظ بده لنفسه ومش هيقوله بشكل صريح لانه هيكون عارف ان الشخص ده بيعني لك او مهم عندك, ولما يعاملهم كويس حتى لو مش بيحبهم ده يعتبر طريقة بيقولك بيها انه بيحبك من غير ما يقولها بشكل صريح.
في النهاية بنقولك ان التصرفات والافعال حتى لو صغيرة, هي اثبات لحبه ليكي, وممكن ميكونش بيقول كلمة بحبك بشكل صريح او مش بيقولها كتير, ولكن طريقته وتصرفاته بتقول ده.
يا ترى كام تصرف من التصرفات عملها الشخص المرتبطة بيه؟ ولو عملها كلها اتأكدي انه بيحبك حب حقيقي.
