8 قواعد مهمه لازم تعرفيهم لو في شغل بينك وبين أصحابك
انك تشتغلى مع حد من اصحابك او حد من العيلة او حد انتى بتحبيه عموما ناس كتير بتعتبره حلم وبيتحقق بس لما الدنيا بتبوظ ممكن تخسري حاجة اغلى من الفلوس والشغل وهى الشخص ده، عشان كده لازم قبل مع تبدأ مع الشخص المفضل عندك فيه قواعد لازم تعرفوها، هنقولك على 8 قواعد مهمه لازم تعرفيهم لو في شغل بينك وبين أصحابك
8 قواعد مهمه لازم تعرفيهم لو في شغل بينك وبين أصحابك
1- اوعوا تنسوا انكوا اصحاب:
لازم علاقتكم ما تتحولش لشغل وبس وتتشاركوا فى حاجات كتير تقوي علاقتكم ببعض جوا الشغل كمان، زي انه ممكن تبقى انتى وصاحبتك عندكوا نفس المكتب او وانتوا مسافرين للشغل تقعدوا مع بعض في نفس الأوضة مثلا ، التفاصيل الصغيرة دي هتخليكم مش هتنسوا ابدا انكوا اصحاب فى الأصل.
اوعوا تنسوا انكوا اصحاب
2- خلى علاقة الشغل والعلاقة الشخصية منفصلين عن بعض:
لما تخلصى شغلك فانتوا اصحاب أما طول ما انتوا فى الشغل خليها شغل وبس دى هى القاعدة اللى هتنجح كل علاقة فيهم وتخليها تستمر. متجيبوش حاجات من الشغل فى علاقتكم كاصحاب، بس فى وقت الشغل خلى كلام الشغل هو الأهم وبعدين طريقة تعاملكم كاصحاب، اللي بنقصده انه طول مانتوا في المكتب اعتبروا انكم مش أصحاب وبمجرد ما وقت الدوام يخلص انسوا اي حاجة ليها علاقة بالشغل وارجعوا اصحاب وبس.
3- اتعودوا على ان الأراء تكمل بعض وإن كانت مختلفة :
الشغل مع حد بيفكر بطريقة مختلفة عنك مفيد جدا لو اتفقتوا فى الأخر لأنه هيخلى شخصيتكوا انتوا الاتنين تظهر بشكل كويس فى شغلكوا، يعنى زي ما بنقول دايما انه عقلين بيفكروا احسن من عقل واحد وانه الاختلاف في الرأي لا يفسد للود قضية.
اتعودوا على ان الأراء تكمل بعض وإن كانت مختلفة
4- اتعلموا تتقبلوا المشاكل والخلافات :
لما تيجى تشتغلي مع حد لازم هيحصل خلافات وصراعات فلازم تتعلمى ماتغضبيش بسرعة لو اى حاجة مضايقاكى قولى من غير ما يحصل خناقة بينكوا، والموضوع أبدا مش شخصي.
شغل بينك وبين أصحابك
اتعلموا تتقبلوا المشاكل والخلافات
5- خلوا الشغل بشكل قانونى يحميكوا انتوا الاتنين:
فى الحماس بتاع بداية الشغل مع الشخص المفضل عندك خاصة او كان فيه نجاح سريع ممكن يبقى سهل جدا ان اجراءات كتير تفوت عليكم بس الإجراءات الصح هتحميكوا انتوا الاتنين، الموضوع مالوش علاقة بالعشم او انكم بتخونوا بعض لكن الشغل شغل و هيضمن حقوقكم لبعض.
6-اختاري شخص هتقدر تقضى معاه وقت طويل:
صديقتك او قريبتك اللى متقدريش تستحمليه لفترة طويلة أكيد مش هو الشخص المناسب إللى ممكن تشتغلى معاه واعرفى إن الشغل محتاج تعب وجهد وسهر و ضغط عصبى كبير عشان كده إنتي محتاجة شريك كويس مش بس صديق.لازم تختارى شخص تقدرى تشتغلى معاه بحب وتفاهم.
اختاري شخص هتقدر تقضى معاه وقت طويل
7- التواصل شىء أساسى:
التواصل الدائم حتو لو كنتوا بعاد أو حتى فى بلدين مختلفين هيخدمكوا دايما فى الصعوبات والتحديات وهيساعدكوا تعدوها بسهولة.
8- الثقة هى الأساس:
شىء ضرورى جدا إنك تختارى شخص بتثقى فيه شخصيا وماليا وأخلاقيا، مهم أوى الشغل مع شخص أمين لإنك هتضمنى الشغل يبقى كويس وفى نفس الوقت هتضمنى إن صداقتكوا مش هتبوظ وهترتاحوا من الحسابات والاختلافات على الفلوس اللي بتعتبر السبب الاساسي لدمار أي شغل أو علاقة صداقة.
افتكري دايما ان الشغل ممكن يبقى فيه مناقشات عن حاجات غير ضرورية ومملة، والحاجات دي ممكن تعمل مشاكل بس لوعلاقتكم كويسة وبتعرفوا تفصلوا الشغل عن الصداقة يبقى ماتقلقيش، أكتر الشركات الناجحة بيديرها عيلة يعني family business وده بيثبت إن الشغل مع القرايب أو الصحاب ممكن جدا، المهم تختاري الناس اللي يدعموكي ويشاركوكي طموحك وانك تفتكري دايما ان المرونة هى مفتاح أى شراكة.
