10 علامات تقولك ان في شخص بيفكر فيكي!
بيكون احساس حلو وانتي بتتخيلي ان في شخص بيفكر فيكي, وانك شاغلة بال شخص تاني وعلى طول في باله, وخصوصا لو الشخص ده مميز بالنسبة لك, فأكيد هتبقي عايزة تعرفي هل بيفكر فيكي فعلا ولا لا! طبعا ممكن تشوفوا ان خيال وصعب انك تعرفيه,
طيب لو قولنالك ان في طاقات نفسية بتوصلك تقولك ان بالفعل في شخص بيفكر فيكي وانك شاغله عقلة! ده اللي هنعرفه النهاردة من خلال السطور الجايه هنقولك علامات تقولك ان شخص بيفكر فيكي.
علامات تقولك ان شخص بيفكر فيكي:
1- العطس:
الاعتقاد ده جذوره من الثقافة الآسيوية, وانه لو شخص ما بيفكر فيكي, هتحسي بحكه في الانف, اللي هيسبب لك العطس بشكل متكرر ورا بعض.
اكيد الكلام ده مش بينطبق في حالة انك تكوني مريضة في الوقت ده, ولكن لو حصل لك عطس متكرر من غير سبب واضح ومعندكيش نزلة برد, في الحالة دي معناه انك مركز لافكار شخص تاني.
طيب يا ترى تقدري تعرفي اي نوعية الافكار اللي بيفكرها فيكي الشخص ده؟ لو عطستي مرتين ورا بعض ده معناه ان الشخص ده بيتكلم عليكي او بيفكر فيكي بطريقة سلبية, لو 3 عطسات او اكتر ورا بعض ده معناه ان الشخص ده بيفكر فيكي افكار ايجابية, او حتى ممكن تكوني وحشاه او بيحبك.
وفي عملية حسابية ظريفة جدا تعمليها عشان تعرفي مين هو الشخص اللي بيفكر فيكي, اطلبي من اي شخص حواليكي انه يقولك اي رقم عشوائي بيتكون من 3 ارقام, والرقم ده ممكن استخدامه عشان تعرفي مين بيفكر فيكي بعملية حسابية بسيطة, مثلا لو الرقم هو 735 اعملي بيهم عملية حسابية بالشكل ده 7 + 3 + 5 = 15 الرقم 15 بيساوي في الابجدية الحرف Q, وده معناه ان الشخص اللي بيفكر فيكي اسمه بيبدأ بحرف Q.
2- احساس حرقان في الاذنين او الخدود:
تخيلي اثار ضرب بالقلم او حرقان خفيف, هو ده الشعور اللي هتحسي بيه لو في شخص بيفكر فيكي او بيتكلم عنك بطريقة سلبية, كانه بيضربك على وشك ولكن بالكلمات.
ممكن العلامة كمان تكون عبارة عن احمرار في الاذنين والخدين, ده مش معناه علامة خجل لو انتي في الوقت ده متعرضيش لموقف يسبب لك الاحراج او الخجل, لكن احساس الحرقان والاحمرار الخفيف ده في الحالة دي ممكن يكون معناه ان في شخص بيفكر فيكي بطريقة ايجابية, وفي اعتقاد كمان ان احمرار الاذن ده معناه ان في شخص جواه مشاعر ناحيتك.
3- الفواق (الزغطة):
الفواق او الزغطة معروف انها بتحصل بعد الاكل, ولكن الفواق العشوائي اللي بيحصل فجأة من غير سبب ده ممكن يكون معناه ان في شخص بيفكر فيكي, ولكن لسوء الحظ انه معناه ان الشخص ده بيفكر فيكي او بيتكلم عنك بشكل مش كويس او بيشتكي لحد منك, وكمان في طريقة تقدري تعرفي مين الشخص اللي بيفكر فيكي او بيتكلم عنك بشكل سيء.
لو الفواق او الزغطة دايما بتحصلك في وجود شخص معين, ده معناه ان هو ده الشخص اللي بيتكلم عنك بشكل مش كويس, وفي الحالة دي تقدري تواجهيه او تبعدي عنه.
بس قبل كل ده لازم تتأكدي ان الزغطة مالهاش سبب تاني واللي عادة بتحصل بسبب الاكل الزيادة, شرب زيادة, الاكل بسرعة كبيرة, عملية جراحية في البطن, امراض تهيج الاعصاب, او بسبب ادوية معينة.
4- حكة العين او ارتعاش العين:
في اقاويل بتقول ان حكة العين او حركة ارتعاش العين اللي بتحصل فجأة دي معناها ان في شخص بيفكر فيكي.
ويقال ان في الرجالة حكة ورعشة العين اليمين دي بتدل على تفكير ايجابي, والعين الشمال بتدل على الافكار السلبية, وعند النساء الموضوع بينعكس, يعني الحكه او الرعشة في العين الشمال دليل على الافكار الايجابية ناحيتك, وحكة العين اليمين هي عن الافكار السلبية.
ولكن بطبيعة الحال لو انتي بتعاني من مشاكل او حساسية في العين يبقى تجاهلي موضوع ان شخص بيفكر فيكي, وممكن كمان التوتر والنظام الغذائي والتعب وعوامل تانية تأدي لحكة او وخز العين, وممكن حالات خطيرة تانية تسبب حكة العين, عشان كده متتجاهليش الاسباب الطبية, يعني فكري في كل الاحتمالات والاسباب التانية الاول وبعدين تفكير شخص فيكي ده يبقى اخر احتمال.
علامات تقولك ان شخص بيفكر فيكي
5- عدم راحة اثناء الاكل:
تخيلي انتي قعدة تاكلي ومستمتعة بالاكل وبتاكلي بالراحة ومش مستعجلة, ومافيش اي سبب انه يخلي حاجة مش كويسة ممكن تحصل, وفجأة تحسي ان الاكل مش بيمر من المريء او زي ما بنقول “وقف في زورك” وتبدأي تكحي وتحسي باختناق برغم انك كنتي بتاكلي بالراحة وواخدة حذرك جدا, في الحالة دي معناه ان في شخص قريب منك بيعاني من توتر شديد, وممكن يكون الموضوع متعلق بيكي, فجسمك بيستجيب للتوتر ده وبيلاقي صعوبة في بلع الاكل.
لو مافيش شخص حواليكي, يبقى اكيد في شخص بعيد بيفكر فيكي, وممكن يكون متوتر وبيفكر فيكي في اللحظة دي, وده بيسبب لك انتي شعور بالتوتر حتى لو من بعيد وبيأثر على البلع عندك اثناء الاكل.
6- تلاقي ريشة بيضا:
الريشة البيضا من الرموز المؤثرة جدا, وعادة بتظهر بعد ما تفقدي شخص يهمك, وبيكون اكيد صعب التعامل مع فقدان شخص, ولكن لو لقيتي ريشة بيضا ممكن ترتاحي, لان الريشة دي معناها ان الشخص اللي فقدتيه في مكان افضل وبيفكر فيكي اثناء وجوده في المكان ده, وبيحاول يبعت لك رسالة تهديكي ويقولك بيها متقلقيش ويطمنك, وبيقولك بيها انه بيراقبك وعايزك تكوني سعيدة.
علامات تقولك ان شخص بيفكر فيكي
7- الاحساس بلمس جسدي مالوش تفسير:
هل حسيتي فجأة قبل كده بان في شخص بيلمسك, وبعدين تبصي حواليكي متلاقيش حد؟ اكيد الاحساس ده ممكن يخليكي تقلقي, وتفكري في حاجة مش طبيعية, ولكن الاحساس ده ليه تفسير.
لو في شخص بيفكر فيكي بقوة كبيرة جدا, ممكن افكاره تنقلك رسالة بتظهر بطريقة مشابهة للاتصال الجسدي, وده يعتبر تواصل بطريقة كبيرة جدا بتدل ان الشخص ده جواه افكار شديدة جدا ناحيتك.
هل الافكار دي بقى ايجابية ولا سلبية؟ مافيش طريقة مؤكدة نقدر نحدد بيها ده, ولكن في بعض الاحيان ممكن تقدري تستنتجي, يعني مثلا لو اللمسة دي لطيفة وخفيفة د ممكن يكون معناها انها من شخص جواه مشاعر ناحيتك, ولكن لو لمسة قوية او مش لطيفة ممكن تكون من شخص حاسس بغضب من ناحيتك او زعلان منك.
8- القشعريرة:
القشعريرة عادة بتكون افكار قوية جدا قايمة على العاطفة ناحيتك, عشان كده تعتبر علامة اكيدة على ان في شخص فعلا بيفكر فيكي, وعلى الرغم انها ممكن تكون ردة فعل جسدية, ولكن هي متجذرة بشكل كبير جدا في العاطفة.
ممكن جدا يحصلك قشعريرة من غير سبب واضح, وده لان شخص بيفكر فيكي وشايفك جذابة جدا وعايز يبقى معاكي, على الرغم من الافكار اللي بتظهر على شكل قشعريرة معناها ان الشخص اللي بيفكر فيكي عنده قدرات نفسية, فانتي محتاجة تفكري ازاي هتتعاملي مع الموقف.
9- التواصل في الحلم:
لو بتشوفي شخص دايما في حلمك, برغم انك متقابلتيش معاه بقالك فترة طويلة, ده معناه انه ممكن يكون بيفكر فيكي, وافكاره قوية بما فيه الكفاية ناحيتك لنقلها ليكي والتعبير عنها بشكل مرئي في احلامك.
وممكن الاحلام تبينلك نوع الافكار اللي بيفكر فيها الشخص ده ناحيتك, ولكن مع ذلك في كتير من الاوقات الاحلام مش بتوضح لنا تفاصيل, في الحالة دي مافيش طريقة تعرفي بيها هل الشخص ده بيفكر فيكي بأفكار ايجابية ولا سلبية.
ولكن في النهاية برضه الاحلام بتكون غامضة, يعني لو شخص ما جيه في حلمك مش شرط انه يكون بيفكر فيكي, لكن احنا بطبيعة الحال بنخلق احلام من ذكرياتنا وتجاربنا الشخصية.
10- التغييرات العاطفية المفاجئة:
بتمري بيوم كويس, وفجأة تحسي بحزن شديد, وبتحسي احساس مش حلو, وفجأة تحسي بالدفء, وبعدين تحسي بالغضب, وبعدها تهدي فجأة, ممكن تبقي مركزة جدا في شغلك, وفجأة ذهنك يتشتت.
كل التغييرات العاطفية المفاجئة دي ممكن تكون افكار شخص تاني واصلة لك, وعادة بيكون واضح ايه انواع الافكار اللي بتسبب كل التغييرات المفاجئة دي, ممكن تكون حاجة مقلقة انك تحسي بحاجة مش من عواطفك او مشاعرك الخاصة, لكن اعرفي ان ده معناه ان في شخص بيفكر فيكي بشكل قوي جدا.
في النهاية اكيد مش كل الاشخاص بيؤمنوا بنقل الحركة النفسية اللي بتقول ان في شخص تاني بيفكر فيكي, واكيد مش بنحاول نغير تفكيرك, ولكن متنكريش انه احيانا بيجي عليكي وقت بتسألي نفسك عن حاجات غريبة ومفاجئة ممكن تكون بتحصلك من غير سبب واضح.
الافكار تعتبر ادوات قوية جدا, والعقل اكتر قوة, ويمكن احنا منكونش فاهمين لحد دلوقتي قدرات العقل البشري, ومنعرفش لحد فين ممكن افكار شخص تاني تأثر عليكي, ولكن في نهاية الامر في حاجات كتير غريبة ومفاجئة ممكن تحصلك تقولك ان في شخص بيفكر فيكي, عشان كده المرة الجايه لما تحسي باي حاجة من اللي احنا قولناها دي, ابتسمي لنفسك واعرفي انه في مكان ما في شخص بيفكر فيكي.
