تيته كوكو و حقوق الزوجه

البوست ده مش هيعجب الرجالة ..

بس الحق أحق أن يتبع ..

هحاول ألخصلك حقوق الزوجة فى النقاط الآتية :

و آتوا النساء صدقاتهن نحلة :

يعني اديهم حقهم فى المهر و الشبكة ...

نيجى بقى للقايمة ... مش موجودة فى الإسلام ... بس برضه مش موجود إن الزوجة تجيب حاجة فى بيت جوزها ... يا سيدى طالما إنت شارى و نيتك إقامة بيت و عيلة توكل على الله ...

و لا تخرجوهن من بيوتهن :

يعنى جنابك لا تمتلك عش الزوجية ... ربنا من فوق 7 سموات ملكه للزوجة ... فلو جنابك زعلت يبقى حضرتك اللى تلم هدومك و لا مؤاخذة و تسيب البيت و هى تقعد فى البيت معززة مكرمة ... ما فيش حاجة إسمها هى تمشى و تروح بيت أبوها ...

و لا تضارهون لتضيقوا عليهن :

يعنى جنابك ما تتعمدش تضايقها أو تزعلها فى الطلعة و الدخلة ... و ما فيش داعى لافتعال المشاكل معاها على الهايفة قبل المليانة ...

و إن كن أولات حمل فانفقوا عليهن :

يعنى تصرف على مراتك الطاق طاقين و هى حامل ... ده حقها و حق ابنك عليك ...

فإن أرضعن لكم فآتهون أجورهن :

يعنى جنابك تجيب كده هدية فخيمة ... دهب أو دياموند أو فلوس نقدية مثلا حسب قدرتك ... عشان ده حقها عليك ...

هاتلها خدامة :

طالما إنت مقتدر هاتلها خدامة تساعدها فى شغل البيت ... و لو ظروفك ما تسمحش ساعدها فى شغل البيت كل ما تبقى فاضى و خفف الطلبات من عليها ...

سلم عليها :

اول ما تخش البيت و قبل ما تغير هدومك سلم على مراتك بالايد و ابتسم فى وشها و قلها كلمة حلوة ... ده حقها عليك ...

فسحها :

يعنى خدها لوحدها أو مع الأولاد و اتفسحوا أو تطلعوا تصيفوا أو تروحوا مولات أو ملاهى ...

ما لكش دعوة بفلوسها :

الزوجة ليها ذمة مالية مستقلة ... يعنى مش من حقك تاخد من مرتبها أو شغلها أو ميراثها ... و ما تسألش عليهم كمان ...

فاجأها :

حضرلها مفاجأة مش على بالها ... هدية حفلة فسحة سفرية مفاجأة عمرة أو حج مثلا ...

بوكيه ورد :

بمناسبة أو من غير دايما خد معاك بوكيه ورد ليها و إنت مروح ... فاجأها و فرحها بيك ...

أكرمها :

خلى بالك من اللى بتوصيك عليهم مراتك ... عشان الناس تحس بقيمتها عندك و تعملها وضع برستيج وسطيهم ...

ما تغلّبهاش :

الستات دايما عندهم مشكلة فى تنويع الأكل ... فلازم تسألك السؤال الشهير ... تاكل إيه النهاردة ؟ ... و الرجالة عندها عقدة من السؤال ده لأنه ما يفرقش معاهم المهم بس يلاقوا حاجة ياكلوها ... فلو مراتك سألتك قلتها بانية و مكرونة دايما ... هتلاقيها تقلك ما تخليها بفتيك و رز معمر ... من غير تردد قلها الله ينور عليكى ... عدي الموضوع ده و كبر دماغك ...

ما تضايقهاش :

يعنى ما فيش داعى تصحيها من النوم عشان تغرفلك الأكل لما تيجى متأخر ... و لّا عشان تدور على الشاحن بتاعك و لّا تسألها فين ريموت التكييف ...

و آتيتم إحداهن قنطارا :

يعنى لو اديت مراتك هدايا أو مجوهرات أو عربية أو أملاك و بعدها طلقتها عشان تتزوج غيرها ... ربنا حرم عليك تاخد اللى انت اديهولها عن طيب خاطر قبل كده ...

الحقيقة حقوق الزوجة كتير ...

و قبل الراجل ما يطلب حقوقه من مراته ... الأصول يديها حقها كاملا الأول ...

معلش زعلت الرجالة النهاردة ...

بس الرجالة اللى بجد هيفرحوا لو كان ده حالهم مع ستاتهم ..